Qondarma Qarabağ Assambleyasının sədri David İşxanyan deyib ki, Ermənistan höküməti sentyabrın 19-da başlayan antiterror tədbirlərindən həmin an və atəşkəslə bağlı qəbul edilən bəyanatdan əvvəlcədən xəbərdar olub. Lakin Paşinyan bunun əksinə olaraq açıqlayıb ki, separatçıların qəbul etdiyi bəyanat Ermənistan hakimiyyəti ilə razılaşdırılmayıb. 
Ermənilərin verdiyi ikibaşlı açıqlama daxildə hakimiyyət parçalanmasının göstəricisi kimi dəyərləndirilir. Separatçılar Ermənistandan istifadə edir, lakin göründüyü kimi Paşinyan isə həm Qarabağdan, həm də orada hakimiyyəti saxlamağa çalışan xuntadan çoxdan imtina edib. Bu Ermənistanda çevrilişə və ya vətəndaş müharibəsinə səbəb ola bilərmi?

Bu barədə Ednews-a politoloq Tural İsmayılov bildirdi ki, Paşinyan və separatçılar arasında böyük çatlar çoxdan yaranmışdı:

“Əslində Paşinyanın Azərbaycanın ərazi bütövlüyünü tanımağı və Praqada bu məsələni qeyd etməsi xunta ilə Ermənistan iqtidarı arasındakı uçurumu daha da dərinləşdirdi. Faktiki olaraq indi Qarabağ erməniləri adı altında maskalanan separatçıları Ermənistanda ağır günlər gözləyir. Azərbaycan vətəndaşlığını qəbul etməyib Ermənistana gedənlərə ögey münasibət bəsləniləcək. İrəvan erməniləri ilə Qarabağ erməniləri arasındakı psixoloji gərginliyin praktiki mənzərəsini daha aydın görəcəyik. Xatırladaq ki, İrəvan erməniləri hər zaman Qarabağ ermənilərini aşağı səviyyəli sayıblar. Faktiki olaraq bundan Paşinyanı devirmək üçün istifadə edən qüvvələr də var. Ermənistanda vətəndaş müharibəsi ehtimalları hazırda yüksəkdir. Siyasi rabitəsizlik bütün qüvvələrdə aydın sezilir. Amma çevriliş ssenarilərinin bitmiş və tükənmiş Ermənistan cəmiyyətində nə qədər reallaşacağı da şübhəlidir”.

Oğuz