Xəbər verdiyimiz kimi, Azərbaycan və Türkiyə Silahlı Qüvvələri işğaldan azad olunmuş Qarabağ ərazilərində birgə hərbi təlimlərə start verib. Qarabağ münaqişəsinin başa çatmasından sonra bu cür birgə təlimləri necə qiymətləndirilir? İki ölkənin hərbi əməkdaşlığı bundan sonra hansı səviyyəyə çata bilər?
Bu barədə Ednews-a politoloq Zərdüşt Əlizadə bildirib ki, Azərbaycan öz suverenliyini bərpa edib. Deməli, bölgədə istədiyini edə bilər:
"Hərbi təlimlər keçirər, ərazilərini minalardan təmziləyər, tikinti-quruculuq işləri ilə məşğul ola bilər və s. Hər iki ölkəyə hərbi sahədə əməkdaşlıq sərf edir. Hər iki ölkənin ordusu xüsusən də, silahlanma məsələsində bir-birinə yaxınlaşır. Hesab edirəm ki, 10-15 il ərzində Azərbaycan ordusunun istifadəsində keçmiş sovet silahları yox, tamamilə Qərb silahları olacaq. Bizə xoşdur ki, NATO-nun ikinci ən güclü ordusu olan Türkiyə bizim yanımızdadır və bu, bizə inam verir".
Politoloq qeyd etdi ki, böyük dövlətlər arasında rəqabət hər zaman davam edir:
"Politologiyada əlifba kimi bəzi labüd həqiqətlər var. Məsələn, onlardan biri odur ki, ordunun silahlanmasında böyük bir dövlətdən asılılıq varsa, həmin ölkə o silahı istehsal edən dövlətlə sıx əməkdaşlığa məhkumdur. Bu əlifbanı bilməyən dövlətlər hər zaman problemlər yaşayırlar".
Oğuz