"Azərbaycan və Fransa arasında diplomatik gərginliyin intensivləşməsinin başlıca səbəbkarı rəsmi Paris özüdür. Son 4 ildir bu ölkə Azərbaycana qarşı bütün platformalarda ən aqressiv formada iş aparır".
Bu sözləri Ednews-a açıqlamasında millət vəkili Könül Nurullayeva deyib. Onun sözlərinə görə, xüsusilə 2020-ci ilin yayında - Tovuz hadisələrindən bəri Azərbaycana qarşı çoxsaylı təxribatlara əl atan Fransa daxili işlərimizə müdaxilə edir, ölkəmizdə kəşfiyyat işi apararaq, özünün 5-ci kalonunu yaratmağa can atır:
"Məlumdur ki, Fransa səfirliyinin iki “katibi” Xarici Təhlükəsizlik Baş İdarəsinin əməkdaşları olub. Onların Azərbaycan DTX tərəfindən zərərsizləşdirilməsi Fransada da Xarici Təhlükəsizlik Baş İdarəsinin məğlubiyyəti kimi qəbul edilir və bu, Yelisey sarayını hiddətləndirib. Fransa mətbuatı Fransanın dənizaşırı dövlətlərdə mövqelərinə xələl gətirən silsilə dövlət çevrilişlərindən sonra bu baş verənləri, E. Makronun Kəşfiyyat Xidmətinin rəhbərini postundan azad etməsi qərarını sürətləndirən amil kimi izah edirlər. Özünü söz azadlığının müdafiəçisi zənn edən Fransa beynəlxalq normalara zidd olaraq, Makronun siyasətini tənqid edən şəxslərin sərbəst hərəkət etmək hüququnu kobud şəkildə pozur. Fransa hökuməti öz tənqidçilərini nəinki ölkəyə buraxmır, onların hətta başqa Avropa ölkələrinə səfərlərini də əngəlləməyə çalışır, bunun üçün digər ölkələrə belə təzyiqlər edir".
Xanım millət vəkili qeyd etdi ki, eyni zamanda Qarabağda “mədəni irsə təhlükə”yə dair əsassız iddialar irəli sürən Fransanın öz ərazisində ucaldılan və qadınların azadlığı rəmzini özündə əks etdirən Azərbaycan ziyalısı-Natəvanın heykəlinin təhqir olunması, vandalizmi törədənlərin hələ də cəzalandırılmaması Parisin əsl simasını açmağa zəmin yaradır:
"Fransa Ermənistana silah satmaqla Bakı ilə İrəvan arasında münasibətlərin normallaşmasına zərbə vurur, Ermənistandakı radikal qüvvələri revanşa həvəsləndirir. Fransa Cənubi Qafqazda sabitliyi pozmaqla kifayətlənmir, Sakit Okean regionunu da müharibəyə sürükləyir. Təsadüfi deyil ki, Paris Hind-Sakit okean, eləcə də Karaib-Amerika zonası və Korsikadan müharibə hazırlıqlarında geostrateji hərbi bazalar kimi istifadə etməkdədir. Burada yeni hərbi bazalar yaratmaq niyyətindərir. Xatırlatmaq yerinə düşər ki, Fransanın Yeni Kaledoniyanın tam özünüidarəetməyə yiyələnməsi üçün beynəlxalq hüquqi öhdəliyi olmasına baxmayaraq, COVİD pandemiyasının ən sərt dövründə məcburi referendum təşkil etmişdi, hətta bu fakt BMT tərəfindən də qınanılmışdı.
Məsələ burasındadır ki, bu gün Fransanın uğursuz cəhdləri həm də Avropa İttifaqının beynəlxalq aləmdə nüfuzuna ciddi zərbə vurur".
Oğuz
