"Azərbaycan 2001-ci ildən bəri AŞPA-ya üzv olduğu vaxtdan bəri bu platformada qaldırılan bütün məsələlərlə bağlı hər zaman ədalətli mövqe sərgiləyib. Amma təəssüf ki, AŞPA ölkəmizi gözdən salmaqdan başqa heç nə etməyib. İşğalçıya göz yuman və ona dəstək verən AŞPA məsuliyyətdən boyun qaçıraraq, Azərbaycanın haqq səsini boğmağa çalışıb. Qəbul etdiyi yarımçıq qərarlarla gözdən pərdə asmaq istəyib".
Bu sözləri Ednews-a millət vəkili Könül Nurullayeva deyib. Onun sözlərinə görə, halbuki, ölkəmiz bu təşkilata üzv olduqda Qarabağ məsələsində AŞPA-dan ədalətli mövqe gözləyirdi. Amma qurum bu illər ərzində nəinki münaqişənin həllinə çalışmadı, bu, azmış kimi Ermənistana dəstək göstərərək, işğalçını daha da stimullaşdırdı:
"Son 3 ildə yaranmış yeni reallıqlar bölgədə dayanıqlı sülh və təhlükəsizlə bağlı ümidləri artırdığı halda AŞPA-nı əksinə daha da narahat etdi. Ona görə də Azərbaycan AŞPA kimi qeyri-ciddi və qərəzli təşkilatla əməkdaşlığı davam etdirə bilməzdi. Bizim üçün vacib olan milli maraqlarımızdır. Azərbaycan müstəqil, suveren, demokratik və multikultural dövlət kimi dünyada nüfuz sahibinə çevrilib. AŞPA ilə əməkdaşlığın dayandırılması və qurumun ölkəmizə qarşı qərəzli ittihamları ölkəmizin imicinə təsir etməyib, bundan sonra edə bilməz. AŞPA bu davranışla özünü gözdən saldı. Azərbaycan əməkdaşlığın dayandırılması ilə heç nə itirmir.
Nümayəndə heyətimizin etimadnaməsini ratifikasiya etməkdən imtina ilə bağlı təklif bütövlükdə Avropa Şurasının etibarlılığına və qərəzsizliyinə ciddi zərbə olacaq, bunun ciddi və geri dönməz nəticələrinə görə məsuliyyət tamamilə onun təşəbbüskarlarının üzərinə düşəcək".
Xanım deputat qeyd etdi ki, ümumiyyətlə, Qərbdəki anti-Azərbaycan qüvvələr bu qurumdan ölkəmizə qarşı təzyiq vasitəsi kimi istifadə ediblər və bu gün də eyni siyasət davam edir:
"Azərbaycanın ərazi bütövlüyü və suverenliyini bərpa etməsini həzm edə bilməyənlər ölkəmizlə diktə dilində danışacaqlarını zənn edirdilər. Lakin Azərbaycan Nümayəndə Heyəti çox haqlı qərar verdi – bu qərəzli qurumla əməkdaşlığı dayandırdı. Bu tarixi qərarla biz sübut etdik ki, Azərbaycana qarşı səslənən ittihamların heç bir əsası yoxdur. Nümayəndə Heyətinin bəyanatında da qeyd edildiyi kimi, “2001-ci ildən 2020-ci ilə qədər olan 19 il ərzində AŞPA işğalçı Ermənistanı Avropa Şurasının əsas dəyər və prinsiplərinə zidd hərəkətlərinə görə cavab vermək barədə qınamadı. Burada söhbət xüsusilə etnik təmizləməyə məruz qalmış azərbaycanlı qaçqın və məcburi köçkünlərin insan haqlarına qarşı açıq-aşkar hörmətsizlikdən gedir”. Azərbaycanın öz suveren ərazilərində beynəlxalq hüquq norma və prinsipləri əsasında həyata keçirdiyi tədbirləri “etnik təmizləmə” kimi qələmə verərək, yenə antiAzərbaycan mövqeyindən çıxış edir. Reallıq göz önündədir. Azərbaycan 30 illik işğala son qoyaraq, regionu sülh bölgəsinə çevirməkdədir. Amma AŞPA başda olmaqla əksər Qərb institutları bu planı pozmağa, regionu yenidən münaqişə bölgəsinə çevirməyə can atır".
Oğuz
