Məlum olduğu kimi, 7 fevral tarixində Azərbaycanda növbədənkənar prezident seçkiləri keçiriləcək. Seçkilərə sayılı günlər qalıb. Bu seçkilərin əvvəlki prezident seçkilərindən tarixi bir fərqi olacaq. İşğaldan azad olunan ərazilərdə ilk dəfə seçki keçiriləcək.
Bəs, görəsən seçkilər sonrası Azərbaycanın daxilində - siyasi, sosial, iqtisadi sahələrdə əhəmiyyəti və gözlənən dəyişikliklər necə olacaq?
Ednews bu barədə tanınmış politolar arasında sorğu keçirib. Cavabları təqdim edirik:
Siyasi şərhçi Fikrət Sadıqov:
“Seçkilərinin əhəmiyyəti düşündüyümüzdən daha böyükdür. Birmənalı olaraq deyə bilərik ki, bu, gələcəyə hesablanmış, əlahiddə prioritetlərə mailk olan seçkidir. Bu seçkinin təşkilini reallığın özü diktə edirdi. İndiki beynəlxalq münasibətlər fonunda 7 fevral seçkiləri tam yerinə düşür. Düşünürəm ki, seçki elektoratı da bu məqamları dəyərləndirə bilir və o baxımdan da seçkiyə ciddi maraq göstərir. Azərbaycanda növbədənkənar prezident seçkilərini keçirməyə həm mənəvi, həm də hüquqi əsasımız var. Yeri gəlmişkən, 2024-cü ildə dünyanın bir sıra aparıcı dövlətlərində də prezident seçkilərinin keçiriləcəyi gözlənilir. Bu amili də nəzərdən qaçırmaq olmaz. Ümumiyyətlə, qarşıdan gələn Zəfər seçkisində qürurlu Azərbaycan seçicisi özünün vətəndaş mövqeyini ortaya qoyacaq və səsini namizədlərdən ən layiqlisinə verəcək”.
Siyasi şərhçi Tofiq Abbasov:
“Prezident seçkilərini yeni bir mərhələnin başlanğıcı kimi dəyərləndirmək olar. Çünki faktiki olaraq, bu günə qədər Azərbaycan bir dövrü keçib və indi yeni mərhələyə qədəm qoyacaq. Arxada qalan son 20 il ərzində həqiqətən də böyük dəyişikliklər, qazanclar əldə olunub. İlk növbədə bu ərazi bütövlüyümüzün bərpa olunmasıdır. Ona qədər Azərbaycan bir çox strateji əhəmiyyətli məsələlərdə - səfərbərlik prosesini həyata keçirə bilmişdi. Bu həm də ordumuzun təkmilləşməsində, yüksəlməsində və eləcə də iqtisadiyyat sahəsində möhkəm ehtiyatlar bazasını yaradılması ilə nəticələndi. Əgər güclü iqtisadiyyat olmasa heç bir maliyyə tutumlu məsələlərin həlli mümkün olmur. Bu baxımdan silah-sursatın alınması, yeni texnologiyaların əldə edilməsi, ordunun quruculuğu, onun döyüş hazırlığının yüksək səviyyəyə qaldırması – bunlar hamısı məhz son 20 ilin ən gözəçarpan naliyyətləridir. Ölkə daxilində problemlərimiz var, halbuki ölkənin hüdudlarının müdafiəsi, sərhədlərin qorunması və.s. bunlar da vəsait və diqqət, strateji yanaşma tələb edir”.
Politoloq Natiq Miri:
“Dövlət başçısı Azərbaycan televiziyalarına verdiyi sonuncu müsahibədə bununla bağlı bəzi mesajlar verdi. Mesajlardan biri də Azərbaycandakı seçkilərdən sonra dəyişikliklərlə bağlı idi. Hətta Prezident bəzi beyin mərkəzləri və siyasətşünaslardan bundan sonrakı cəmiyyətin inkişafı və birliyi ilə bağlı yeni qayələr istədi. Hər bir halda, əgər burada Azərbaycan dövlətini möhkəmlətmək və cəmiyyəti inkişafına nail olmaq niyyəti varsa, deməli, ortada konkret hədəflər də mövcuddur. Çünki əvvəlcə hədəf müəyyənləşdirilir, sonra isə niyyət. Bu baxımdan, bu cür hədəf və niyyətlərin varlığı ölkədəki dəyişikliklərə bilavasitə həm də bir işarədir. Ancaq hər bir halda Milli Məclisdən tutmuş dövlət strukturlarında, eyni zamanda kadr və digər məsələlərdə, xüsusilə də ədalət sahəsində və ədalətin tam bərpa və bərqərar olması kontekstindəki dəyişiklər Azərbaycan cəmiyyətinin xeyrinə ola bilər”.
Politoloq Tural Əliyev:
“Azərbaycan Prezident Respublikası olduğu üçün prezident seçkilərinin əhəmiyyəti böyükdür. Qarabağ işğaldan azad olunduğuna görə seçkilər yeni geosiyasi reallıq müstəvisində keçiriləcəkdir. Bu, təkcə ölkəmizdə deyil, həmçinin regionda postmünaqişə dövründə müsbət tendensiyalar və çağırışlara cavab verən sistemi formalaşdıracaq. İlk növbədə dövlətin təhlükəsizlik və sabitlik kursu davam etdiriləcək, hər bir halda iqtisadiyyat, sosial inkişaf sadalanan faktorlara söykənir. Bu gün dünyada və bölgədə qlobal böhranların tüğyan etdiyi bir vaxtda Azərbaycanın qarşısında duran ən prioritet amil sərhədlərin təhlükəsizliyidir. Bu səbəbdən ordu quruculuğu sahəsində islahatlar davamlı olacaq, xarici siyasət kursu mehriban qonşuluq və beynəlxalq təşkilatlarla əməkdaşlığı özündə ehtiva edən balans qorunub saxlanılacaq.
7 fevral seçkilərindən sonra Azərbaycan yeni dövrə qədəm qoyacaq. Ənənəvi neft -qaz sahəsi ilə yanaşı, yaşıl enerjiyə keçid sürətlənəcək. Alternativ enerji mənbələri yeni dünya düzənində əsas göstəriciləridən biri olacaqdır”.
Oğuz
