Berlində Azərbaycan-Ermənistan Xarici İşlər nazirləri arasında müzakirələrin ikinci raundu keçirilib. 8 kəndin azad edilməsi və Zəngəzur dəhlizinin açılması ilə bağlı tərəflər arasında müzakirələrin hansı mərhələdə aparıldığı ehtimalı var?
Mövzu ilə bağlı Ednews-a açıqlamasında politoloq Tural İsmayılov bildirdi ki, Qərb uzun müddətdir bölgədə müharibə hazırlıqları aparmaq istəyir. Konkret olaraq Fransanın rəhbərliyi altında Ermənistan ciddi şəkildə Azərbaycan əleyhinə qızışdırılır:
“Ermənistana Fransadan müxtəlif təxribatçı, təhrikedici dəstəklərin göstərilməsi, həmçinin sonuncu olaraq Fransa müdafiə nazirinin Ermənistanla hansısa anlaşma imzalaması və burada bölgə ilə bağlı təhdidkar bəhs etməsi, bütün bunların fonunda Avropa İttifaqı missiyası adı altında Ermənistan ərazilərində Qərb şəbəkəsinin ciddi şəkildə koordinasiya edilməsi regionda oynanılan təhlükəli oyunları göstərir. Belə olan təqdirdə bölgədə uzunmüddətli sülh və sabitlik mümkün olmur. Əslində sülh və sabitlik buradakı regional layihələrin dirçəlməsinə, eyni zamanda yeni əməkdaşlıq platformalarının yaranmasına səbəb ola bilər. Bunu yaxşı başa düşən qərb burada Rusiya, Türkiyə, Çinin Azərbaycanın önəmli iqtisadi layihələr və yeni alternativ layihələrlə dirçəlməsini həzm etmək istəmir. Bu səbəbdən də Ermənistanı qızışdıraraq bölgədə regional layihələri sabotaj etməyə çalışır. Bu baxımdan da düşünürəm ki, qərbin bütün addımları Ermənistanı növbəti dəfə savaşa sürükləmək deməkdir və baş verən tendensiyalar da göstərir ki, bu çox təhlükəli bir oyundur. Ümumiyyətlə, Ermənistanın öhdəsinə götürdüyü öhdəliklər var. Bunların içərisində də Azərbaycanın anklav kəndlərini qaytarmaqla bağlı təbii ki, ortada konkret mövqe var”.
Politoloq hesab edir ki, bütövlükdə delimitasiya komissiyalarının bundan sonrakı görüşləri, eyni zamanda, Azərbaycanla Ermənistan arasındakı normallaşma prosesinin gələcək taleyi Azərbaycanın anklav kəndlərinin vəziyyətindən birbaşa asılı olan bir məsələdir:
“İki ölkə arasında əgər münasibətlərin normallaşmasından danışırıqsa, gələcək perspektivlərdən söhbət gedirsə, baxmayaraq ki, qərb Ermənistanı müharibəyə hazırlaşdıraraq vəziyyətin gərgin olmağına çalışır. Şanslar və imkanlar hələ də tükənməyib. Baxmayaraq ki, Ermənistan sırf hərbi ritorikadadır, müharibəyə fokslanıb. Amma Azərbaycanın kəndləri də əlbəttə, Azərbaycana qaytarılmalıdır. Bu gün Ermənistan özü aktiv şəkildə qərb və Fransa tərəfindən savaş psixologiyasına fokuslansa da, indi erməni ictimai rəyində və dünya mediasında fərqli bir vəziyyət yaradaraq vəziyyəti tamam başqa cür izah etməyə çalışır ki, bu iddiaların da hesab edirəm heç bir real əsası yoxdur və ola da bilməz. Amma Ermənistan Azərbaycanın anklav kəndlərini Azərbaycana qaytarmalıdır. Yəni, bu normal danışıqlar fonunda baş verməsə əlbəttə ki, bizim hər an hərbi yolla ərazi bütövlüyümüzü bərpa etmək hüququmuz var”.
Oğuz