Ermənistan hərbçiləri son günlərdə tez-tez Naxçıvan və Zəngəzur istiqamətində atəşkəsi pozurlar. Yeddi aylıq sakitlikdən sonra ilk dəfədir ki, belə təxribatlar silsilə xarakter almağa başlayıb. Nə baş verir, niyə bunun üçün Naxçıvan və Zəngəzur istiqamətləri seçilib?
Mövzu ilə bağlı siyasi şərhçi Elşən Manafov Ednews-a açıqlaması zamanı deyib ki, Ermənistan baş nazirinin Brüseldə ABŞ və Avropa Birliyi rəsmiləri ilə keçirdiyi məlum göruşdən dərhal sonra Azərbaycanla həmsərhəd bölgələrdə atəşkəsin mütəmadi olaraq pozulması Qərbin bölgədə geosiyasi konfiqurasiyanın dəyişdirilməsi ilə bağlı planlarının kifayət qədər ciddiliyindən xəbər verir:
“Ermənistanin məhz Naxçıvan və Zəngəzur ətrafında təxribata getməsi Qərb və Rusiya, habelə Qlobal Cənub arasında dəhlizlər uğrunda getdikcə qızışmaqda olacaq qarşıdurmalarının doğurduğu reallıqdır. Zəngəzur perspektivi ilə bağlı məsələlərə fərqli baxışlar bölgədə nüfuz dairəsi uğrunda mübarizəni kəskinləşdirir. Ermənistan iqtidarı Qərbin dəstəyi ilə bəlli şərtlər və öhdəliklər müqabilində hakimiyyətə gəldiyindən onun məlum istiqamətdə gedəcək oyunlarda yer alacağı birmənalı idi”.
Politoloq hesab edir ki, təxribatların məlum istiqamətlərdə baş verməsi Ermənistana baş verənlərə görə məsuliyyəti rəsmi Bakının üzərinə yıxmaq imkanı verdiyindən, ermənilərin hücumları silsilə xarakter kəsb etməyə başlayıb:
“Erməni tərəfi baş verənlərə görə Qərbin rəsmi Bakiya təzyiqlərinin güclənməsinə çalışır. Azərbaycanın regionun təhlükəsizlik problemlərinin həllinə fərqli baxışı, onun müstəqil siyasət yeritməsi Qərbi Ermənistan vasitəsilə rəsmi Bakiya təzyiqləri gücləndirməyə sövq edir. Onu Qərbin təklif etdiyi prinsiplər əsasında danışıqlara təhrik etmək, Rusiya əleyhinə sanksiyalara qoşulmağa məcbur etmək məqsədi daşıyır”.
Oğuz