Ermənistanın irqi ayrı-seçkiliyin bütün formalarının ləğvi haqqında Konvensiyanın tətbiqi ilə bağlı beynəlxalq məhkəməyə müraciəti rədd edilməlidir, çünki Ermənistan bu cür müraciət üçün ilkin şərtləri yerinə yetirməyib. Bundan əlavə, Ermənistanın üçüncü müraciəti heç bir halda bu Konvensiyanın yurisdiksiyasına aid deyil, bu da iddianın mahiyyəti üzrə rədd edilməsini tələb edir.

Ednews xəbər verir ki, bunu xarici işlər nazirinin müavini Elnur Məmmədov Haaqa Beynəlxalq Məhkəməsində Azərbaycanın ilkin etirazları ilə bağlı dinləmələr zamanı Ermənistanın 22-ci maddə üzrə öhdəliklərini yerinə yetirmədiyini bildirib.

Onun sözlərinə görə, 22-ci maddə mübahisənin danışıqlar yolu ilə həll edilmədiyi təqdirdə məhkəməyə verilə biləcəyini nəzərdə tutur.

Məmmədov Ermənistanın üçüncü şikayətində hərbi münaqişə zamanı erməni əsgərlərinə, hərbi qulluqçularına və mülki şəxslərə qarşı qəddar rəftarla bağlı əsassız ittihamların olduğunu, Azərbaycanın qəti şəkildə qəbul etmədiyini vurğulayıb.

"Bu məsələlər irqi ayrı-seçkiliyin bütün formalarının ləğvi haqqında Beynəlxalq Konvensiya çərçivəsində məhkəmənin yurisdiksiyasına aid deyil... Buna baxmayaraq, Azərbaycan bu ittihamlara çox ciddi yanaşır və heç bir halda beynəlxalq humanitar hüququn və insan hüquqları sahəsində digər beynəlxalq normaların pozulması iddialarına məhəl qoymur. Əksinə, bu cür ittihamlara çox ciddi yanaşır. Mövcud məlumatlar göstərir ki, Ermənistandan fərqli olaraq, məhkəmə prosesi zamanı ittihamlar sübuta yetirildikdə Azərbaycan öz vətəndaşlarını müvafiq iddialara görə qınamaqdan çəkinmir", - nazir müavini əlavə edib.

Nazir müavini bildirib ki, Azərbaycan beynəlxalq humanitar hüququn və digər beynəlxalq insan hüquqları normalarının iddia edilən pozuntularını heç bir şəkildə qəbul etmir:

"Ermənistandan fərqli olaraq, Azərbaycan öz vətəndaşlarını müvafiq cinayətlərdə mühakimə etməkdən çəkinməyib. İkinci Qarabağ müharibəsi və ondan sonra ələ keçirilən erməni hərbi qulluqçuları və digər məhbusların əksəriyyəti Ermənistana qaytarılıb. Qaytarılmayanlar isə ağır cinayətlərə görə məhkum ediliblər, ya da hazırda hərbi cinayətlər, terrorizm və ya separatizmə görə mühakimə olunurlar".