Ərəb mediasında yayılan məlumata görə, İsrail ordusu Misir və Fələstin sərhədində olan Rəfah şəhərini işğal etmək məqsədi ilə vətəndaşlardan şəhəri boşaltmağı tələb edib. Dünən isə İsrail ordusu Rəfah şəhərinin  sərhəd məntəqəsinə daxil olub. 

Əgər İsrail Rəfah şəhərini ələ keçirərsə Şərq regionuna təsiri necə olacaq? Müharibənin alovlanması mümkün görünür?

Məsələ ilə bağlı Misir Silahlı Qüvvələrin Strateji Araşdırmalar Mərkəzinin müşaviri, briqada generalı Xalid Fəhmi Ednews-a verdiyi açıqlamada bildirib ki, İsrail oktyabrın 7-dən bəri İsrailli girovları azad etmək məqsədi ilə Qəzzada bəzi əməliyyatlar həyata keçirdi, lakin, İsrail bu günə kimi məqsədinə çata bilməyib: 

“Digər tərəfdən hərbi əməliyyatlar beynəlxalq təşkilatlar tərəfindən sərt reaksiya ilə qarşılanacaq. Çünki beynəlxalq ictimaiyyətin İsrailə qarşı münasibəti kəskin şəkildə dəyişib. İsrail xalqına gəlincə, onlar hərbi əməliyyatı pisləyir, çünki çox yaxşı bilirlər ki, bu, İsrail ordusuna və ölkənin iqtisadiyyatına təsiri ağır olacaq”.
Hərbi əməliyyata Misirin reaksiyasından danışan ekspert bildirib ki, Misirin münasibəti heç də yaxşı olmayacaq, xüsusən Misir regionda sülh və sabitliyə və bu münaqişənin diplomatik yollarla həll edilməsinə çağırışlar edir.

Hərbi ekpert qeyd edib ki, Misir Həmas - İsrail müharibəsi başlayandan bəri Rəfah keçidini bağlamayıb və fələstinlilərə yardım edib: 

“Əgər İsrail hərbi əməliyyata başlasa, bu, HƏMAS ilə İsrail arasında atəşkəs danışıqlarını dayandıracaq və iki tərəf arasında gərginlik yenə artacaq”.

Məsələ ilə bağlı həmçinin İsrail məsələləri və regional təhlükəsizlik üzrə strateji ekspert, general-mayor Dr.Vael Rabie də münasibət bildirib:

“Bütün bunlar yanlız Netanyahu tərəfindən bir təzyiqdir. Çünki, Netanyahu özünü həbsdən xilas etmək istəyir, bunun üçün Rafah şəhərinə daxil olmaqdan başqa çarəsi qalmayıb.Hesab edirəm ki, hərbi əməliyyat tez bir zamanda dayanacaq. Bunun da bir çox əsasları var: 

Birincisi: Fələstin tərəfində insan itkiləri böyük olacaq, bu da İsrailə qarşı beynəlxalq mövqeyi, xüsusən də Amerikanın mövqeyini çətinləşdirəcək.

İkincisi: Hərbi əməliyyəta fələstinli silahlı qrupların reaksiyası sərt olacaq. 

Üçüncüsü: İsrailli girovların ailələri yaxşı bilirlər ki, Rəfahdakı bombardmanın fonunda girovlar arasında itkilərin olması ehtimalı çoxdur.

Dördüncüsü: Rəfahda hər hansı itki Beynəlxalq Cinayət Məhkəməsinin Netanyahunu və tərəfdaşlarını həbs etmək qərarını dəstəkləyəcək”.

Loğman Yunis