"Xankəndində konsulluq açılması Azərbaycanın ərazi bütövlüyünə hansısa təhdid yaratmır".
Bu fikirləri Ednews-a açıqlamasında millət vəkili Fəzail Ağamalı bildirib.
Xəbər verdiyimiz kimi, Rusiya Federasiya Şurasının Beynəlxalq Əlaqələr Komitəsinin rəhbəri Qriqori Karasin yaxın gələcəkdə hələ infrastrukturun tamamlanmadığı, əhalinin köçürülməsinin hələ heç başlamadığı Xankəndidə baş konsulluğun açılması planlarının olduğunu elan edib. Məsələ həm siyasi dairələrdə, həm də ictimaiyyətdə geniş müzakirələrə səbəb olub.
Məsələ ilə əlaqədar Fəzail Ağamalı deyib ki, Rusiya tərəfindən belə bir təklifin edilməsin in arxasında hansısa gizli məqsədlər yoxdur.
“Azərbaycan bu gün Cənubi Qafqazın ən güclü dövlətidir. Rusiya dövlətimizin ərazi bütövlüyünü müharibədən sonra Putin səviyyəsində bəyan edib. Bu səbəbdən Rusiyanın niyyətini Azərbaycanın ərazi bütövlüyünə hansısa təhdid kimi qəbul etmək doğru olmaz”.
Millət vəkili onu da vurğulayıb ki, Rusiyanın bu niyyəti yaxın müddət yox, gələcək üçün hesablanıb. Belə məsələlər əvvəlcə hər iki dövlətin rəsmi qurumları arasında müzakirə edilməlidir.
Siyasi şərhçi Oqtay Qasımov saytımıza açıqlamasında bildirib ki, bu hal Türkiyə ilə bağlı da yaşanıb. Müharibədən bir müddət keçdikdən sonra Türkiyə rəsmi şəkildə Şuşada konsulluq açmaqla bağlı müraciət etmişdi və bu təklifə Azərbaycan da buna etiraz etməyib.
“Belə hallar dünya təcrübəsindən göründüyü kimi, tez-tez baş verir. Dövlətlərin bir-birinin ərazisində konsulluq açma niyyətləri hər zaman olmuşdur. Lakin Rusiyanın hansısa şirkətinin Qarabağ ərazisində olmaması, sülhməramlıların ölkəmizi tərk etməsi, Qarabağda heç bir Rusiya vətəndaşının olmaması səbəbilə deyə bilərik ki, belə bir təklif indiki dövrdə heç bir məntiqə sığmır. Bu fikirlər 2022-ci ilin fevral ayında iki ölkə arasında imzalanan Müttəfiqlik bəyannaməsi çərçivəsində müzakirələr əsasında dəyərləndirilməlidir. Ümumilikdə isə Azərbaycanda yaşayan Rusiya vətəndaşlarının sayı da o qədər çox deyil ki, ölkəmizin hansısa şəhər və rayonunda bu ölkənin konsulluğu fəaliyyət göstərsin”.
Ekspert sonda onu da vurğulayıb ki, Rusiyanın Ermənistan ərazisində də konsulluq açmaq niyyəti olub. Bu müəyyən mənada başa düşülərdi. Ermənistandakı Zəngəzur Mis-Molibden Kombinatında fəaliyyət göstərən Rusiya şirkətləri, eləcə də Ermənistanla İran sərhədini qoruyan Rusiya hərbçilərinin varlığı bunu deməyə əsas verir. Lakin indiki dövrdə Azərbaycanda Rusiya konsulluğunun açılmasına heç bir ehtiyac yoxdur.
Səfər Əlizadə
