İlham Əliyevin Ermənistanı ATƏT-in Minsk Qrupunun ləğvi ilə bağlı rəsmi bəyanat vermək çağırışına İrəvandan ard-arda cavablar gəlir. Ermənistan parlamentinin spikeri Sülh sazişi imzalanandan sonra Minsk Qrupunun mənası itəcək və bu məsələ də öz-özünə həll olunacağını deyib. Erməni keşişi Baqrat Qalstanyan da bu dəfə Alen Simonyanla eyni mövqedən çıxış edib və bildirib ki, sülh danışıqlarında ATƏT-in qarant kimi iştirakı son dərəcə vacibdir.
Ermənistanın bir-birinə düşmən düşərgələri niyə hələ də heç bir diplomatik təşəbbüsü olmayan bu təşkilatdan əl çəkmək istəmirlər?
Mövzu ilə bağlı siyasi şərhçi Əlimusa İbrahimov Ednews - a fikirlərini bölüşüb. O söyləyib ki, Ermənistan tərəfi bu təklifin məhz Azərbaycan gəldiyini əsas götürərərək bu çağırışa şübhə ilə yanaşır:
"Azərbaycanda olduğu kimi Ermənistanda da ATƏT-in Minsk Qrupunun artıq öz funksiyasını itirdiyinin fərqindədirlər. Çünki Azərbaycan Respublikası Prezidentinin bu barədə verdiyi bəyanat etiraz etmək və bu istiqamətdə tutarlı sübut gətirmək mümkün deyil. Elə məhz buna görə də Azərbaycan tərəfi Ermənistanı bu addımı atmağa çağırıb. Ermənistan tərəfi isə bu təklifin məhz Azərbaycan gəldiyini əsas götürərərək Azərbaycanın çağırışına şübhə ilə yanaşırlar. Onlar ATƏT-in MİNSK Qrupuna xəyallarına köçürdükləri Qarabağdan bir nişanə kimi baxırlar və hesab edirlər ki, Minsk Qrupunun ləğv olunması onların Qarabağ xəyallarına son nöqtəni qoyacaq.
Digər tərəfdən ATƏT-in Minsk Qrupunun ləğv olunması barədə bəyanat Ermənistanla onun Qərbdəki və Okeanın o tayındakı havadarları arasında narazılığa səbəb ola bilər. Xatırlayırsınızsa Qarabağın Azərbaycanın tərkib hissəsi olması barədə verdiyi bəyanatlar ona qarşı olan qüvvələrin fəallaşmasına səbəb olmuşdu. Rusiya rəhbərləri yeri gəldikcə bu bəyanatı yenə də Paşinyanın üzünə vururlar. Ermənistan rəhbərliyində təmsil olunan şəxslərin ATƏT-in Minsk Qrupunun ləğvini üsülh müqaviləsinin imzalanması ilə əlaqələndirmələri, onların bu müqaviləni nəyin bahasına olursa-olsun, tez tələsik imzalamaq istəkləri ilə bağlıdır.
Görünür onlar xaricdəki havadarlarından bu istiqamətdə müəyyən tapşırıqlar alıblar.İstənilən halda. Ermənistanla Azərbaycanla münasibətlərdə və sülh müqaviləsinin bağlanması ilə əlaqədər nə istəməklərindən asılı olmayaraq, Azərbaycan heç bir təzyiq və təsirə boyun əyməyəcək və nəyi, nə zaman, necə həll edəcəyini özü müəyyən edəcək".
Əkbər Novruz
