"Xocalı hava limanında dövlət bayrağının dalğalanması təkcə Azərbaycanın qələbəsi deyil, milli bütövlüyü və öz müqəddəratını təyinetmə prinsiplərinə inanan hamımız üçün ümid və birlik rəmzidir".

Bu sözləri Ednews-a Pakistan-Azərbaycan Məzunları Assosiasiyasının (PAAA) təsisçisi və prezidenti Kayzer Navab Xocalı hava limanında Azərbaycan bayrağının dalğalanmasına şərh olaraq söyləyib. Onun fikrincə, Xocalı hava limanında dövlət bayrağının qaldırılması Azərbaycan xalqının gücünü və mətanətini simvolizə edir:

"Bu nailiyyət Azərbaycanın Ali Lideri və Prezidenti cənab İlham Əliyevin rəhbərliyinin və uzaqgörənliyinin sübutudur. Onun rəhbərliyi altında Azərbaycan suverenliyə, sülhə və inkişafa sadiqliyini ardıcıl olaraq nümayiş etdirib. Azərbaycan Müdafiə Nazirliyinin məlumatına görə, Vətən Müharibəsindən sonra Azərbaycan ərazisində müvəqqəti dislokasiya olunmuş Rusiya sülhməramlı kontingentinin çıxarılması iyunun 12-də artıq başa çatıb. Bu hadisə Azərbaycan hökumətinin sülhün bərpası və qorunub saxlanılması sahəsində uğurlu səylərini bir daha vurğulayır. 

Bu qələbə Xocalı Soyqırımının faciəvi hadisələri ilə dərindən bağlı olduğu üçün böyük əhəmiyyət kəsb edir. 1992-ci il fevralın 26-da Ermənistan silahlı qüvvələri və MDB-nin 366-cı alayı Xocalı şəhərində dinc azərbaycanlıların kütləvi şəkildə qətlə yetirilməsini həyata keçirib. Bu qətliam Azərbaycanın milli şüurunda silinməz iz qoyaraq Dağlıq Qarabağ münaqişəsində ən böyük vəhşiliyə çevrildi. Xocalı hava limanında bayrağın qaldırılması Azərbaycan xalqının göstərdiyi fədakarlıqların və dözümlü ruhunun acı xatırlatması kimi xidmət edir".

Assosiasiya prezidenti sonda Pakistan xalqının bu sevincə şərik olduğunu söyləyərək, Azərbaycan xalqını ürəkdən təbrik edib:

Bu hadisə hər bir azərbaycanlı üçün qürur çırağı, milləti irəli aparan davamlı ruhun bir xatırlatmasıdır. Bu hadisə yalnız Azərbaycanda deyil, Pakistanda da sevinc mənbəyidir. Pakistan-Azərbaycan Məzunları Assosiasiyası kimi biz daha çox belə qələbələr gözləyir və Azərbaycan rəhbərliyinə və xalqına ən xoş arzularımızı çatdırırıq”.

Əkbər Novruz