ABŞ dövlət katibinin Avropa və Avrasiya məsələləri üzrə müavini Ceyms Obrayen Ermənistana səfər edib. İrəvanda o, baş nazir Nikol Paşinyan və xarici işlər naziri Ararat Mirzoyanla görüşüb, həmçinin Ermənistan və ABŞ arasında Strateji Dialoqun yekun iclasında iştirak edib. ABŞ rəsmilərinin İrəvana səfərlərinin əsl məqsədi və Azərbaycanın burada mövqeyi necə olacaq?
Bu barədə Ednews-a politoloq Elşən Manafov bildirdi ki, ABŞ rəsmilərinin son vaxtlar İrəvana olan səfərlərinin artması rəsmi Vaşinqtonun Cənubi Qafqazla bağlı geosiyasi maraqlarından irəli gəlir.
Onun sözlərinə görə, ABŞ Paşinyan rejimi vasitəsilə bölgədə gərginliyin artmasına, bölgə ətrafında geosiyasi konfiqurasiyanın öz xeyrinə dəyişməsinə, Rusiyanın bölgədən sıxışdırılıb çıxarılmasına, nəqliyyat dəhlizləri üzərində onun maraqlarına cavab verəcək şəraitin formalaşdırılmasına can atır:
"Məhz ABŞ-ın rəsmi İrəvanla olan təmaslarının nəticəsidir ki, Paşinyan iqtidarının bəyanatlarında antirusiya ritorikası güclənib. Onun KMTD-dən Ermənistanın çıxacağı ilə bağlı məlum açıqlamaları Rusiyanın qıcıqlandırılmasına, onun rəsmi İrəvana qarşı tədbirlər görməsinə hesablanıb ki, bu da eskalasiyanın güclənməsinə səbəb ola bilər. İdarə olunan xaos ABŞ-ın təkcə regiona deyil, bütövlükdə yeni dünya nizamının formalaşdırılmasına hesablanmış planlarının realizə edilməsində düşünülmüş geosiyasi doktrinadır. ABŞ-ın regional proseslərə müdaxiləsinin nəticəsidir ki, Paşinyan Azərbaycanla sülh danışıqlarına siyasi spekulyasiya maraqlarından yanaşır. Onun açıqlamalarında qeyri-müəyyənlik artmağa başlayıb. Cənubi Qafqaz mühüm tranzit yollarını özündə birləşdirir. ABŞ bu regionun yaxın perspektivdə loqistik imkanlarının daha da artacağının mahiyyətinə varır. Ona görə də bölgə ərtafında geosiyasi reallıqları dəyişməyə çalışır".
Oğuz
