Fransa Rusiya üçün son dərəcə faydalı olan Şimal-Cənub dəhlizinin yaradılmasına qarşı çıxmaq və Ermənistanı bu layihəyə qoşulmaqdan kənarlaşdırmaq məqsədilə Cənubi Qafqazda fəallaşıb. Fransa niyə məkrli planlarından vaz keçmir?
Həmçinin, Ermənistan və Fransa hərbi-texniki əməkdaşlıq haqqında saziş imzalayıblar. Fransa Ermənistanı silahlandırmaqla Cənubi Qafqazda hansı geosiyasi maraqları güdür?
Beynəlxalq Avrasiya Mətbuat Fondunun prezidenti Umud Mirzəyev bu barədə Ednews-a açıqlaması zamanı bildirdi ki, son yüz ildir Fransanın Cənubi Qafqazda maraqları hiss olunur. Həm də Bolşevik inqilabından əvvəl və Sovetlər dağıldıqdan sonra da Fransanın regionda həmişə maraqları olub.
Onun sözlərinə görə, Fransa Cənubi Qafqazda problemin həll olunmaması üçün əlindən gələni edib:
“Onlar bəzən bunu biruzə verməməyə çalışırlar, amma son 30 ildə bu münaqişənin Minsk qrupunda həll edilməməsinin ən böyük səbəbkararından biri də Fransadır. Halbuki, Ulu öndər Heydər Əliyev o vaxt Fransanın Minsk qrupunda yer almamasına çalışırdı, yəni razı deyildi. Onlar öz vədlərinə də xilaf çıxdılar və axıra qədər Cənubi Qafqazda problemin həll edilməməsi üçün əllərindən gələni etdilər.”
U.Mirzəyev qeyd etdi ki, Ermənistan regionda faydalana biləcəyi bütün layihələrdən kənarda qalır:
“Ümumiyyətlə, nəinki Fransa, bütün supergüclərin təkcə Cənubi Qafqazda yox, bütün dünyada geosiyasi maraqları olub. Onlar regiondakı iqtisadi resurslara nəzarət etməyə və bu regionlarda yerləşən ölkələrin zəif olması üçün əllərindən gələn hər şeyi etməyə hazır olublar. Bu gün Ermənistanın silahlandırılması və separatçı qüvvələrin revanşist addımlar atmasına rəvac vermək kimi təşəbbüslər göstərməsi müşahidə olunmaqdadır.
Onlar çalışırlar ki, hər bir ölkənin inkişafı üçün faydalı olan iqtisadi layihələrin qarşısını alsınlar. Çünki, bu layihələr onların regiondakı təsirini həmişəlik sonlandıra bilər. Ona görə də Ermənistanın daxilindəki bəzi qüvvələr nəhayət ki, kimin dost, kimin düşmən olduğunun fərqində olmağa başlamalıdırlar. Sonra onlar üçün gec olacaq”.
Fərid Axund