Bildiyimiz kimi bu gündən Aİ-95 markalı avtomobil benzininin 1 litrinin qiyməti 1.60 manat olacaq. Əvvəllər 2 manat dəyərində olan benzin, bir çox sahələrdə qiymət ucuzlaşmasına təsir edə bilər. Qiymət dəyişimi insanların həyatında hansı dəyişikliklərə yol açacaq?

Məsələ ilə bağlı Ednews-a açıqlamasında benzin qiymətinin ucuzlaşmasının bazarda məhsulların qiymətinin azalmasına təsir etməyəcəyini bildirən iqtisadi ekspert Günay Hüseynova, qiymətlərin tənzimlənməsi zamanı iki əsas faktora diqqət çəkib:

“Bu sahədə qiymətlər tənzimlənərkən əsasən dünya standartları ilə müqayisə olunur. Burada əsasən, iki faktor göstərilir: neft hasilatının azalması və neft emali zavodlarının yeni standartlara cavab verməsi üçün kapital qoyuluşu. Sadəcə olaraq bu məsələdə maraqlı bir məqam var ki, qiymətlər qalxsa da, ensə də, ərzaq və qeyri-ərzaq məhsullarının qiymətində azalmağa doğru dəyişiklik olmur. 

Bunu təkcə iqtisadçılar yox, sadə vətəndaş da bilir. Burada əsas olan nəzarətin olmasıdır. Azərbaycanda azad bazar iqtisadiyyatı olduğu üçün sahibkara məhsulunu hansı qiymətə satacağını deyə bilmərik. Bir balaca, ”sıxışdırma” olan kimi məhsul xarici bazara çıxarılır və beləcə məhsulların ən yaxşısı xaricə göndərilir. Yaxud, əksinə kəndlidən dəyər-dəyməzə daxili bazarda ucuz qiymətə alınır yenə baha qiymətə satılır. Düşünürəm ki, vətəndaşların mənafeyi naminə daha çox kənd təsərrüfatı sahəsinin ciddi nəzarətə və tənzimləməyə ehtiyacı var.”

Fərid