“Bu həftə ABŞ Senatının Təxsisatlar Komitəsi bir sıra tədbirləri, o cümlədən Ermənistana 65 milyon dollar yardım nəzərdə tutan 2025-ci maliyyə ili üçün Xarici Əməliyyatlar haqqında qanun layihəsini təsdiqləyib”, - bu barədə Amerika Erməni Komitəsi bildirir. Bildirilir ki, bu pullar guya islahatlar və Avro-Atlantik inteqrasiya istiqamətində istifadə olunacaq. Qanun layihəsində qeyd edilir ki, Komitə Ermənistan və Azərbaycan arasında davamlı sülh sazişinin əldə edilməsi səylərini dəstəkləyir və Dövlət Katibinə və USAİD-in Administratoruna akt əsasında ayrılan vəsaitlərin bölüşdürülməsi zamanı belə danışıqların vəziyyətini nəzərə almağı tapşırır. 

ABŞ Ermənistanı nəyə görə yenə də “revanşizm”ə sövq edir?

“Qərbin Ermənistana qoyduğu ümidin nəticəsi bu günlərdə İrəvanın xeyrinə işləmir. Bu nə Ermənistan-Azərbaycan münaqişəsinin həll olunmasında nə də, ümumiyyətlə Ermənistanın özü üçün heç bir xeyir vermir. İrəvan bu gün Ukraynanın yolunu, yəni Qərbə üz tutmaq yolunu seçib. Ukraynada baş verən hadisələrin Ermənistanda da baş verməsi mümkündür.”

Bu fikirləri Ednews-a açıqlamasında siyasi ekspert Ramiyə Məmmədova Qərbin Cənubi Qafqazda güclənmək üçün Ermənistandan necə istifadə etdiyini izah edib: 

”Bu o deməkdir ki, Qərb bu gün Rusiyanın regionda sıxışdırmağa və Azərbaycan-Ermənistan münasibətlərində öz rolunu gücəndirməyə çalışır. Təbii ki, Azərbaycan bu münaqişənin həll olunmasında rol almaq istəyən heç bir ölkənin qarşısında dayanmır. Azərbaycanın prioriteti sülh müqaviləsinin bağlanmasıdır. Hər hansı bir üçüncü dövlət Ermənistanı danışıqlar masasına cəlb etməyi bacaracaqsa Azərbaycan buna müsbət yanaşır. Lakin, biz bunu görürük ki Qərbin Cənubi Qafqazdakı maraqları nə sülh müqaviləsi, nə də regionun sakitləşməsi ilə bağlı deyil. Onların buradakı tək marağı Rusiyanı üçüncü dövlət kimi bu məsələdən uzaqlaşdırmaqdır. 

Qərb Ukraynaya gətirdiyi NATO inteqrasiyasını artıq Qafqaza da gətirmək niyyətindədir. Bu da öz nəvbəsində təbii ki, region ölkələri üçün müsbət hal deyil. Ermənistanın Rusiyadan uzaqlaşıb Qərbə yaxınlaşdığını görürük ki, bu da ölkənin gələcəkdə varlığı üçün ciddi problemlər yaradır."

Ekspertin sözlərinə görə, Qərbin Ermənistanda revanşizm ideyalarını gücləndirməsi onu regionda müharibəyə sövq edir:

“Biz bunu Gürcüstanın simasında da gördük. Lakin, ən son baş verən hadisələrdən sonra onlar da Aİ-na üzv ola bilməyəcəklərini anladılar və yenidən Rusiyaya üz tutdular. Çünki, Rusiya bu regionda ən böyük dövlətlərdən biridir və onunla düşmənçilik münasibətləri aparmamaq heç bir ölkə üçün müsbət hall deyil. 

Ermənistanda ABŞ və Fransa tərəfindən təməli qoyulan revanşizm ideyaları Ermənistanın yenə də anlamsız çıxışlar etməsinə gətirib çıxarıb. Ermənistanın daxilində müxalifət və iqtidar arasında baş verən bu çaxnaşma da bu məsələyə təsir edir. Hazırda biz Qərbin Ermənistanı müharibəyə sövq etməsinə şahid oluruq. Ona görə də, Ermənistan regionda gələcək üçün böyük problemlər yaradır. Bu problemin həll olunması üçün Ermənistan silahlanmanı bir kənara qoyaraq Azərbaycanla sülh müqaviləsinə razılaşmalı və prosesin sakit yollarla həll edilməsinə razı olmalıdır.”

Fərid