Azərbaycan Hökuməti, ABŞ Beynəlxalq İnkişaf Agentliyi (USAİD) və Azərbaycandakı BMT İnkişaf Proqramı (BMTİP) tərəfindən cümə günü Masallıda Qadın Resurs Mərkəzi və SYSLAB Məşğulluq Mərkəzinin rəsmi açılışı baş tutdu. Bu mərkəzlər Əmək və Əhalinin Sosial Müdafiəsi Nazirliyi və Ailə, Qadın və Uşaq Problemləri üzrə Dövlət Komitəsi ilə birgə əməkdaşlıq çərçivəsində həyata keçirilən "Sahibkarlığa və məşğulluğa iqtisadi dəstək" layihəsi çərçivəsində yaradılıb. Hər iki mərkəz Masallı şəhəri Heydər Əliyev Mərkəzində yerləşir və Masallı rayon İcra Hakimiyyəti tərəfindən dəstəklənir.
Tədbir iştirakçılarını salamlayan Əmək və Əhalinin Sosial Müdafiəsi nazirinin müavini cənab İdris İsayev yerli icma və ümumilikdə bütün regionun faydalanacağı bu təşəbbüsə görə Azərbaycan Hökuməti adından inkişaf tərəfdaşlarına öz minnətdarlığını bildirdi.
Ailə, Qadın və Uşaq Problemləri üzrə Dövlət Komitəsinin sədr müavini xanım Sədaqət Qəhrəmanova xəyallarındakı biznesi qurmaq üçün kənd/rayon qadınlarına göstərilən davamlı dəstəyi qiymətləndirib və gələcək əməkdaşlıqlara Komitənin dəstək verəcəyini bildirib.
BMTİP-in Rezident Nümayəndəsi cənab Qulam İshaqzai inklyuziv və dayanıqlı inkişaf üçün xüsusilə kənd/rayon yerlərində sosial-iqtisadi həyatda qadıların rolu və gənclərin fəal iştirakının əhəmiyyətini vurğuladı. "Azərbaycan Hökuməti, USAİD və BMTİP arasındakı bu tərəfdaşlıq qadın və gənclərə öz bizneslərini açmaq, istəklərinə uyğun uğurlu karyeraya başlamaq və həyatları üzərində nəzarət əldə etməklə bir mənalı şəkildə öz həyatlarını yaxşılaşdırmağa kömək edir. Bu, tez-tez həyat çətinliklərinə daha həssas və kövrək olan həm qadın, həm də gənclər üçün eyni dərəcədə vacibdir. Biz bu insanlara yardım etməklə bu gözəl ölkənin gələcəyinə kömək edirik”, - deyə cənab Ishaqzai öz çıxışında bildirib.
Cənab Ishaqzai layihə komandası ilə uğurlu əməkdaşlıq etdikləri üçün Masallı İcra Hakimiyyətinin başçısı cənab Rafil Hüseynov və bütün hökumət tərəfdaşlarına öz minnətdarlığını bildirdi. "Bu hadisə bütün tərəflərin tək və eyni məqsəd, ortaq qlobal və yerli Dayanıqlı İnkişaf Məqsədləri yolunda öhdəliklərini sübut edir ", - deyə cənab İshaqzai əlavə etdi.
ABŞ səfirliyinin iqtisadi məsələlər üzrə nümayəndəsi cənab Karter Vilnur iqtisadiyyatda qadınların iştirakının artırılmasının güclü cəmiyyətə töhfə verdiyini vurğuladı. “Masallıda Məşğulluq Mərkəzlərində bacarıqların təkmilləşdirilməsi vasitəsi ilə biz cəmiyyətdə qadın və gənclərin yalnız iş qabiliyyətini yox, həmçinin biznes və iş yerlərində yeni ideyaların yaranması, inkişaf etdirilməsi və onlar üzərində fəaliyyət bacarıqlarını artırırıq.”
Nümayəndə heyəti layihədən necə bəhrələndiklərini eşitmək üçün layihə iştirakçıları ilə görüşüb və layihə nəticəsində öz bizneslərini quran qadın və layihə zamanı iş tapan gəncləri sertifikatlarla mükafatlandırıb. Onlar daha sonra yeni qurulan ASAN mərkəz və Masallıda Ailə Biznesinə ASAN dəstəyini (ABAD) ziyarət edib.
"Sahibkarlığa və məşğulluğa iqtisadi dəstək" adlı birgə layihənin əsas məqsədi regionda Qadın Resurs Mərkəzi və SYSLAB Məşğulluq Mərkəzlərində bacarıqların artırılması ilə qadın sahibkarlığı sahəsində iqtisadi səlahiyyətlərin artırılması və gənclərin məşğulluğunu dəstəkləməkdir.