Fransa Ermənistanda – Gorus rayonunda yeni fəxri konsulluq açıb. Rəsmi açılış mərasimi iyunun 1-də baş tutub və bu, Fransa-Ermənistan münasibətlərində yeni diplomatik mərhələnin başlanğıcı kimi təqdim edilib.

EDnews xəbər verir ki, açılış mərasimində Fransa və Ermənistanın rəsmi nümayəndələri, yerli hakimiyyət orqanlarının üzvləri və iki ölkənin səfirləri iştirak ediblər. Konsulluğun fəaliyyətə başlaması Fransanın Cənubi Qafqazdakı mövcudluğunu gücləndirmək cəhdi kimi qiymətləndirilir.

Tədbirdə Fransanın Ermənistandakı səfiri Olivye Dekotini, Gorus şəhərinin meri Aruş Aruşanyan və konsulluğa təyin olunmuş Karmen Apunts iştirak ediblər. Lakin açılış mərasimi zamanı yaşanan insident sosial şəbəkələrdə və mətbuatda ciddi rezonans doğurub.

Mərasimdə lentin kəsilməsi anında səfir Olivye Dekotini Karmen Apuntsun önə çıxmasına mane olub və onu arxaya itaətsiz şəkildə itələyib. Ardınca isə Gorus şəhərinin meri Aruş Aruşanyan da Apuntsu kənara çəkməyə cəhd göstərib. Hadisə kameralar tərəfindən qeydə alınıb və sosial şəbəkələrdə yayılıb.

Səfirin bu davranışı tənqid obyektinə çevrilib. İstifadəçilər bunu diplomatik etiketə zidd və hörmətsizlik nümunəsi kimi qiymətləndiriblər. Ermənistan ictimaiyyətində və bəzi analitik çevrələrdə bu hadisə Fransa nümayəndələrinin bölgədəki davranış tərzinə dair narahatlıqları yenidən gündəmə gətirib.

Hadisəyə dair hələlik rəsmi açıqlama verilməsə də, gözləntilər var ki, Fransa səfirliyi və ya Xarici İşlər Nazirliyi məsələyə münasibət bildirəcək.

Qeyd edək ki, Gorus rayonu Ermənistanın Azərbaycanla sərhəddə yerləşən, strateji əhəmiyyətli bölgələrindən biridir. Fransanın burada fəxri konsulluq açması Cənubi Qafqaz regionunda balans və diplomatik mövqe baxımından xüsusi əhəmiyyət kəsb edir.

 Fatimə Şükürova // EDnews