Ermənistanın polis rəisi, eyni zamanda daxili işlər nazirinin müavini olan general Aram Ovannisyan tutduğu vəzifədən azad edilib. 

Qərar Ermənistanın baş naziri Nikol Paşinyan tərəfindən imzalanıb. Rəsmi sənəddə istefanın səbəbləri qeyd olunmasa da, Ovannisyanın Paşinyanın tələbi ilə istefa ərizəsi yazdığı bildirilir. Bu barədə məlumat onun vəzifədən uzaqlaşdırılmasından bir neçə dəqiqə əvvəl ictimaiyyətə açıqlanıb.

Ovannisyanın istefası Ermənistan ictimaiyyətində müxtəlif təhlillərə yol açıb. Rəsmi səbəblər açıqlanmasa da, müxalifət dairələri və bəzi siyasi analitiklər bunu daxili idarəçilikdəki gərginliklər və institusional narazılıqlar kontekstində qiymətləndirirlər. Son dövrlərdə Ermənistan daxilində polis orqanlarının fəaliyyəti və idarəçilik təcrübəsi ilə bağlı tənqidi fikirlər də artmaqdadır.

Xatırladaq ki, Aram Ovannisyan uzun müddət hüquq-mühafizə sistemində çalışıb və Paşinyanın hakimiyyəti dövründə önəmli vəzifələrə gətirilib. Onun vəzifədən getməsi daxili işlər strukturlarında növbəti kadr islahatlarının başlanğıcı kimi də qiymətləndirilə bilər.

Hələlik Ovannisyanın yerinə kim təyin olunacağı barədə rəsmi məlumat yoxdur.

 
Fatimə Şükürova // EDnews