Ukrayna Prezidenti Volodimir Zelenski ABŞ-ın Ukraynaya vəd etdiyi 20 min zenit raketinin başqa istiqamətə — Yaxın Şərqə göndərilməsindən narazılığını bildirib.

EDnews xəbər verir ki, bu barədə dövlət başçısı “ABC News” telekanalına müsahibəsində danışıb. Zelenskinin sözlərinə görə, Ukrayna bu silah partiyasına ciddi şəkildə ümid bəsləyirdi.

“Biz bu 20 min raketə ümid edirdik. Bu səhər müdafiə nazirim mənə dedi ki, ABŞ həmin raketləri Yaxın Şərqdəki qüvvələrinin ehtiyaclarını qarşılamaq üçün göndərib”, – deyə Zelenski vurğulayıb.
Ukrayna lideri həmçinin qeyd edib ki, ABŞ Ukraynanın hava hücumundan müdafiə ehtiyaclarına dair sorğularına cavab verməkdə gecikir. O, bir neçə dəfə videomüraciətlə çıxış edərək, Vaşinqtonu lazımi texnika və silahların tədarükündə tərəddüd göstərməkdə qınayıb.

Zelenskinin bu açıqlaması ABŞ-Ukrayna münasibətlərində ehtiyatlılıq və prioritet fərqlərinin mövcudluğunu bir daha gündəmə gətirib. Hazırda həm Rusiya ilə müharibənin gedişi, həm də Yaxın Şərqdəki gərginliklər, xüsusən İsrail-Fələstin münaqişəsi fonunda, Vaşinqtonun hərbi resurslarının bölüşdürülməsi siyasəti qlobal diqqət mərkəzindədir.

Fatimə Şükürova // EDnews