“Operatorlar yeni yol çəkiblər, amma təklif edirlər ki, bu yolda ancaq ferrari sürmək olar” - Osman Gündüz yeni internet tariflərindən DANIŞDI - ednews.net

25 Sentyabr,

(+994 50) 229-39-11

“Operatorlar yeni yol çəkiblər, amma təklif edirlər ki, bu yolda ancaq ferrari sürmək olar” - Osman Gündüz yeni internet tariflərindən DANIŞDI

Elm və texnologiya A- A A+
Xəbər verdiyimiz kimi, ölkənin əsas internet provayderləri “Aztelekom” və “Baktelekom” tərəfindən yeni tariflər müştərilərə təqdim edilib. 
 
Belə ki, şirkətlər GPON texnologiyası ilə fiber-optik internet xidməti üçün bu addımın atıldığını bildiriblər.
 
“Operatorlar yeni yol çəkiblər, amma təklif edirlər ki, bu yolda ancaq ferrari sürmək olar”
 
Bu sözləri Azərbaycan İnternet Forumunun prezidenti Osman Gündüz "Aztelekom" və "Baktelecom"un yeni qiymət siyasəti haqda Ednews-a danışarkən deyib. 
 
“"Baktelecom" və "Aztelekom" GPON texnologiyası ilə fiber optik internet xidməti üçün yeni tarif paketi təqdim etməklə bağlı bir müddət öncədən də açıqlamalar vermişdilər. Artıq bu xidmətdən istifadə edənlər üçün əvvəlki 4 Mb/s və 10 Mb/s sürətlər ləğv edilib və müvafiq olaraq 15 və 30 Mb/s sürətlər təklif edilib. Qiymətlər də, təbii ki, artıb, 4 Mb/s üçün 10 manat ödəyənlər indi 15 Mb/s üçün 15 manat ödəyəcəklər. 10Mb/s üçün 12.5 manat ödəyənlər də  indi 30 Mb/s üçün 18 manat ödəyəcəklər”. 
 
O.Gündüz qeyd edib ki, adı çəkilən dövlət operatorlarının şəbəkəni modernləşdirməsi, fiber infrastrukturun yenilənməsi, infrastruktura yeni investisiyalar yatırması və nəticə olaraq yüksək sürətlər təqdim etməsi çox təqdirəlayiqdir, amma... 
 
“Məlumdur ki, RİNN 2 il müddətinə bütün ölkə üzrə keyfiyyətli və hər yerdə əlçatan internet infrastruktur qurmağı hədəfləyib və bu istiqamətdə sistemli olaraq işlər aparır. Bütün bunlar çox təqdirəlayiqdir, amma birdən-birə hamı üçün yüksək sürətlər təklif etmək və buna uyğun da əvvəlki aşağı sürətə uyğun qiymətdən xeyli yüksək ödəniş tələb etmək doğru yanaşma deyil”. 
 
Ekspertin sözlərinə görə, heç bir investisiya yatırımı, böyük sürətlərə ehtiyacı olmayan məhdud bir təbəqəni yüksək ödənişlə yüksək də sürət əldə etməyə məcbur edə bilməz. 
 
“Bu, doğru olmazdı. Xüsusən də, bazarda hökmran mövqe tutan, dövlətə məxsus operatorlar üçün bu, yolverilməzdir. Düşünürəm ki, indiki şəraitdə, internetə əlçatanlığın insanların əsas  fundamental hüquqlarından biri hesab olunduğu bir vaxtda, yüksək sürətə ehtiyacı olmayanlar üçün, əvvəlki ödəniş səviyyəsində, təxminən  10-12 manat civarında bəlli bir internet sürəti təklif oluna bilərdi. Əminəm ki, xeyli sayda GPON istifadəçiləri daha böyük sürət seçiminə üstünlük verəcəklər”.
 
O.Gündüz bir daha vurğulayıb ki, adı çəkilən dövlət operatorlarının son zamanlar infrastrukturun yenilənməsi istiqamətində həyata keçirdikləri müsbət addımlara rəğmən məhdud seçim imkanı verən qiymət siyasəti doğru yanaşma deyil.
 
“Maraqlıdır ki, Rəqəmsal İnkişaf və Nəqliyyat Nazirliyi hələlik bu məsələyə müdaxilə etməyib. Qiyməti operatorlar qaldırıb. Bunun özü də doğru bir yanaşma deyil. Nazirlik hazırda həm də tənzimləyicidir. Təəssüf ki, hələlik bu funksiyanı yerinə yetirməli olan, Prezident fərmanı əsasında yaradılan İKT Dövlət Agentliyi də formalaşmayıb. Nizamnaməsi hələ də yoxdur, rəhbərliyi də həmçinin. Hesab edirəm ki, Nazirlik tabeliyindəki dövlət operatorlarının qiymət siyasətinə müdaxilə etməlidir. Qısa bir araşdırma ilə görmək olar ki, dövlət operatorlarının təklif etdiyi yüksək sürət üçün olan qiymətlər hətta bəzi özəl provayderdən də bahadır. Hansı ki , normalda bu tərsinə olmalıdır. Düşünürəm ki, bu məsələni, Nazirlik və operatorlarla birlikdə İctimai Şurada da müzakirə etmək faydalı olardı”.
 
Gülnar Səlimova


Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary


Загрузка...