Xəzər rayonu, Şüvəlan qəsəbəsində yerləşən, sağlamlıq imkanları məhdud uşaqlar üçün nəzərdə tutulmuş 12 nömrəli xüsusi internat məktəbinin keçmiş əməkdaşı Gülnar Ələsgərova məktəbin direktoru Allahverdi Vəliyevin əxlaqsız təklifinə “yox” cavabı verdiyi üçün işdən çıxarıldığını iddia etmişdi.

Həmin iddia mediada böyük səs-küyə səbəb olmuş və nazirlik tərəfindən araşdırılma başlanmışdı.

Əxlaqsız təklif etdiyi iddia edilən məktəb direktoru Allahverdi Vəliyev məsələ ilə bağlı danışıb. Musavat.com saytına danışan direktor bütün iddiaların əsassız olduğunu bildirib: "Həmin xanım buradan əvvəlki iş yerində də problemlər yaradıb. Direktora hücum çəkib. Hətta məsələ hüquq mühafizə orqanlarına qədər gedib çıxıb. Sonra nazirlik humanist addım atıb, onun 3 övladını nəzərə alıb, onu işə qəbul edib, onu buraya təyin edib. 2016-cı ilin aprel ayında burada işə başlayan həmin xanım dəfələrlə müxtəlif üsullarla işdən yayınıb. Onun tək istəyi məktəbdə vəzifəyə sahib olmaq idi. 

Dəfələrlə bu barədə söhbət açıb. Baş tərbiyəçi olmaq niyyətində idi. Mən də ona bildirmişəm ki, mənim elə səlahiyyətim yoxdur. Bu işə nazirlik baxır. Sonra məni hədələməyə başladı. Sonda da mənə böhtan atdı. Mənim işimə, yaşıma, şərəfimə belə addım atmaq yaraşmaz. Mən atayam, nəvələrim var. Haqqımda belə yazıların yazılması mənə pis təsir etdi. Bu məktəbdə işləyən bütün kollektivdən soruşa bilərsiniz. Mən hamısına ata və qardaş kimi davranıram. Bu məsələdən sonra nazirliyin əməkdaşları ilə birlikdə həmin xanım da məktəbə gəlmişdilər. Araşdırma aparıldı. Özünün də imzası ilə hadisənin yalan olması ilə bağlı akt tərtib edilidi. O ki, qaldı uşaqların təmizlik aparması ilə bağlı yaydığı videoya, onu da özü planlayıb. Süpürgəni verib uşağın əlinə, videosunu çəkib. O hadisə də araşdırıldı və yalan olduğu sübut edildi. Bir daha bəyan edirəm ki, həmin xanımın dedikləri sonuna qədər böhtandır".