Millət vəkili Qənirə Paşayeva Elazığda bölgənin ən böyük kəndlərindən olan Xankəndi sakinləri ilə görüşüb.
Millət vəkili görüşdə xankəndililərə Dağlıq Qarabağ, Xankəndinin tarixi haqda danışıb və Erməistanın işğalı nəticəsində bölgələrimizdə törədilən vandalizm aktları barədə geniş məlumat verib.
Millət vəkili onları Qarabağ həqiqətlərinin yayılmasında daha fəal olmağa çağırıb.
Q.Paşayeva Elazığda həmçininin türk dünyasının müxtəlif dövlət və bölgələrindən gələn şair, yazar, aydın, QHT və KİV rəhbərləri ilə görüşüb.
Millət vəkili bildirib ki, harada doğulmasından və yaşamasından asılı olmayaraq hər bir türk insanı Qarabağ həqiqətlərinin dünyaya çatdırılması üçün çalışmalıdır.
“Bir türk xalqının, toplumunun problemi bütün türk xalqlarının ortaq problemidir. Ona görə də türk dünyasıyla bağlı məsələlərdə bir-birimizə hər zaman böyük dəstək olmalıyıq. Bu məsələdə millət vəkilləri ilə bərabər, QHT və KİV rəhbərlərinin, araşdırmaçıların, aydınların və jurnalsitlərin üzərinə çox böyük missiya düşür. Onlar fəaliyyətlərində və yaradıcılıqlarında Azərbaycana, Qarabağ problemi mövzusuna daha geniş yer verməlidirlər”.
Q.Paşayeva sonda xankəndililərə Azərbaycan mədəniyyəti, tarixi, Qarabağ həqiqətləri ilə bağlı materiallar, həmmüəllifi olduğu, Qarabağ həqiqətlərini özündə geniş əks etdirən materialları təqdim edib.
