Düz bir ay sonra biz Ermənistanın 1992-ci ildə həyata keçirdiyi Xocalı soyqırımının ildönümünü qeyd edəcəyik. Bu cinayəti törədənlər hələ də azad şəkildə Ermənistanda gəzirlər və ədalət qarşısında cavab verməyiblər. Ermənistan Silahlı Qüvvələrinin işğal edilmiş Azərbaycan torpaqlarından, o cümlədən Xocalıdan çıxarılmasını tələb edən assambleyanın 1416 saylı qətnaməsi Ermənistan rəhbərliyi tərəfindən son 13 ildə yerinə yetirilməmiş qalır. Buna baxmayaraq Assambleya tərəfindən Ermənistanın bu cür hərəkətinə qarşı heç bir ciddi addım atılmayıb.
Bu sözləri bu gün AŞPA-da Azad Müzakirələrdə (Free Debate) çıxış edən Azərbaycan nümayəndə heyətinin üzvü, millət vəkili Qənirə Paşayeva söyləyib. O, işğalçı Ermənistanın prezidentini təşkilata dəvət edən AŞPA rəhbərliyinə etirazını bildirib və Sərkisyanın səsləndirdiyi yalanlara sərt cavab verib:
“Ermənistan Silahlı Qüvvələrinin növbəti təxribatının qarşısını almağa çalışarkən təkcə yanvar ayında 2 gənc azərbaycanlı həyatlarını itirib. Bu qətnamənin qəbul edilməsinə baxmayaraq, Ermənistan Silahlı Qüvvələri Zəhra, Fariz, Aygün adlı körpə uşaqları və onlarla mülki vətəndaşı vəhşicəsinə öldürmüş, yaralamış, onların evlərini dağıtmış və yandırmışdır. Parlamentdə cəbhəboyu ərazilərdə yerləşən regionlardan birinin təmsilçisi kimi həqiqəti öz gözləri ilə görmək arzusunda olan həmkarlarımı regionumuza dəvət edirəm. Siz Ermənistanın cəbhəboyu ərazilərdə törətdiyi cinayətləri öz gözlərinizlə görəcəksiniz. Bu qətnamə yerinə yetirilmiş olsaydı, çoxlu sayda insan, onlarla körpə və mülki vətəndaşlar öz həyatlarını itirməmiş olacaqdı. Təəssüf ki, bu qətnamələrin yerinə yetirilməsi üçün Ermənistana təzyiq göstərmək əvəzinə AŞPA bu işğalçı dövlətin prezidentini bizim təşkilata dəvət etmiş və ona yalanlar üzərində qurulan nitq söyləmək imkanı verilmişdir. Biz bunu qınayır və kəskin şəkildə etirazımızı bildiririk. Çünki Ermənistan prezidenti Azərbaycan torpaqlarının işğalında və Xocalı soyqırımının törədilməsində birbaşa iştirak etmiş şəxsdir”.
Millət vəkili Assambleyanın işğal edilmiş Azərbaycan torpaqlarından erməni silahlı qüvvələrinin çıxarılmasını tələb etmədiyinə görə narazılığını ifadə edib və bu cür ikili standartlara son qoymağa çağırıb:
“Bizim xalqımız AŞPA-dakı ikili standartların səbəbini anlaya bilmir. Çox təəssüflər olsun ki, assambleya 1 milyon azərbaycanlı qaçqın və məcburi köçkünlərin öz doğma evlərinə qayıtması barədə qətnamələri yerinə yetirməyən işğalçı dövlətin rəhbərindən onun Avropa Şurasına səfəri müddətində bu cür hərəkətləri dayandırmağı və qətnamələri yerinə yetirməyi tələb etmədi.
Ermənistan həmçinin Avropa Şurasının çağırışlarına məhəl qoymur və girovluqda saxlanılan azərbaycanlılar - Dilqəm Əsgərovu və Şahbaz Quliyevi azad etməyi rədd edir. Bizim təşkilatın rəhbərləri Ermənistandan onları azad etməyi ciddi şəkildə tələb etməli və onların haqlarını qorumalıdır. Assambleyanı, təşkilat rəhbərlərini Xocalı soyqırımının ildönümü ərəfəsində bu dəhşətli cinayəti qınayan bəyanat qəbul etməyə çağırırıq. İlk növbədə biz bunu bəşəriyyət naminə etməliyik.
Bir müddət əvvəl Azərbaycan, Gürcüstan və Türkiyə birlikdə Avropanı Asiya ilə birləşdirən Bakı-Tiflis-Qars dəmiryolu layihəsini işə saldılar. Bu böyük layihə tək bizim üçün deyil, həm də bütün Avropa üçün vacibdir. Ermənistan tərəfindən Azərbaycan torpaqlarının işğal edilməsindən irəli gələn gərginliyin davam etməsi tək bizim maraqlara deyil, həm də Avropanın maraqlarına böyük hədədir. Ona görə də assambleya bu məsələnin həllində daha fəal rol oynamalıdır”.
