Hər gün sosial şəbəkələrdə aktiv istifadəçilərin sayı 1 milyon nəfər artır. Son hesabatlara görə, sosial şəbəkələrdə aktiv istifadəçilərin sayı 3 milyardı ötüb. Hazırda dünyada ən böyük sosial şəbəkənin "Facebook" olduğu bildirilir. Bu sosial şəbəkənin auditoriyası 2 milyard aktiv istifadəçidən ibarətdir. Və Azərbaycanda da "Facebook" ən populyar sosial şəbəkədir. "Facebook"dakı azərbaycanlı istifadəçiləri fəallığına görə bir neçə yerə ayırmaq olar. Gününün hətta yarıdan çoxunu burada keçirənlər olur. Bir də hər gün baş vermiş hadisə, müzakirə predmeti olan məsələlərlə bağlı status yazmasını gözlədiklərimiz var.
Eyni zamanda bəzi insanların cahilliyinin ən çox göründüyü yer də təəssüf ki, sosial şəbəkələrdir. Təbii ki, kifayət qədər ciddi, ağıllı, səviyyəli insanlar da var, onlardan mən də öyrənirəm. Amma bezdirən, yoran, səviyyəsiz yanaşmalar da olur və müəyyən mənada əziyyət verir. Yoxsa başqa narahatlıq doğuran məqam yoxdur. Bu, sosial şəbəkədir, fərqli rəylərin olması normaldır. Amma bəzi insanların və qrupların sənin düşüncənə, mühakimənə maneə törətməsi, yaxud onu əngəlləməsi tendensiyası xoşagələn deyil. İnsanlar mədəni şəkildə özünün hansısa problemi ilə bağlı yazanda, cavab verirsən. Amma səndən asılı olmayanları səndən tələb etmək, haqqı çatmadığı halda siyasi, ideoloji baxışlarına görə aşağılamaq niyyətilə müəyyən addımlar atılanda, təbii ki, buna qarşı çox sərt mövqe göstərməyə də hazır olmalısan.
Tam səmimi deyirəm, məni artıq təccübləndirməli heç nə qalmayıb. Müşahidələrim adətən məni yanıltmır. Sosial şəbəkələr özünü pulsuz tanıtma alətidir, unikal bir tribunadır. Bu imkandan hərə öz düşüncəsi seqmentində yararlanmağa çalışır. Kimisi şeir yazmaqla, kimisi aforizm paylaşmaqla, başqa biri dərdini bölüşməklə, digəri yalandan formalaşdırdığı qəhrəman obrazı ilə...
Mənim xoşuma gəlməyən bir məqam da var. Bəziləri məsələnin mahiyyətinə varmadan, ağına-bozuna baxmadan hər şeyə etiraz edirlər. İnsanı tanımadan paylaşdığı statusun altına qəribə, heç bir çərçivəyə sığmayan sözlər yazırlar. Əgər həmin istifadəçilər təhqir edirlərsə, tanımadan-bilmədən ittiham irəli sürürlərsə onlara qarşı yalnız bir mübarizə metodu var: dostluq siyahısından çıxarmaq !
Kiminsə qəlbini qıracaq, kiminsə şəxsiyyətinə toxunacaq paylaşımlarım olmayıb. Şəxslərə aid çox az status paylaşıram. Son vaxtlar baş verənlər sözün düzü məni məhz bu cümlələri yazmağa vadar etdi. Dövlətə , dövlət başçısına, onun köməkçilərinə və dövlət atributlarına qarşı aparılan çirkin kampaniya … Çox təəssüf ki, biz bu halı az qala hər gün müşahidə edirik. Strategiya da bəllidir: “Çamur at! Yapışmasa da, iz buraxacaq...”
Birincisi ondan başlayım ki, bu gözəl həyat təkcə bizim deyil. Bu həqiqəti anlayıb başqalarına ziyan vermədən yaşamağı öyrənməliyik. Bizim azadlıqlarımızın artması daha etibarlı və daha yaxşı bir dünyaya gedən yoldur. Bir aksiomdur. Amma mən azadlıq anlayışını istənilən vaxt kimisə təhqir etmək, söymək, aşağılamaq sərbəstliyi ilə eyniləşdirə bilmərəm. Çünki bizim azadlığımız bir başqasının aşağılanmasına yönəlməməlidir.
Əlbəttə indi təhqir, söyüş və aşağılama azadlığından gen bol istifadə edənlər var. Və onların ölkədə kifayət qədər nüfuzu olan insanlara dövlət məmurlarına, ziyalılara və hətta tanınmış jurnalistlərə qarşı hücumları tez-tez müşahidə olunur. Mənim üçün sosial şəbəkənin məhz bu ən xoşagəlməz xüsusiyyətidir ki, istənilən şəxs əlini qolunu sallaya-sallaya hər kəsə çamur ata, onu aşağılaya bilər. Bunun qarşısını almaq təəssüf ki, mümkün deyil. Amma aqil insanlar buna qarşı mütləq mübarizə aparmalıdır.Ən azı baş verən bu xoşagəlməz hallara öz mövqeyini bildirməklə.
Təəssüf ki, sosial şəbəkənin bizə verdiyi azadlıqdan sui-istifadə edənlərin, sosial şəbəkəni söyüş poliqonuna çevirənlərin bir çoxu sadəcə bu addımı atarkən bir insan olaraq düşünmür.
Ortalığa da belə bir ürək bulandırıcı vəziyyət çıxır. Bəli, mən razıyam. Düşünə bilən hər kəsin insan olması, insan olan hər kəsin düşünə bildiyi mənasını vermir.Təhqir edənin niyyəti sizdən cavab almaqdır. Təhqir edən sizdən cavabı almış olursa, özünü qələbə qazanmış kimi hesab edir. Ona bu hissi yaşatmaq bizə lazımdırmı? Onu da unutmayaq ki, qəsdən deyilmiş pis, yaralayıcı sözlər və ya hərəkətlər mütləq bumeranq kimi sahibinə qayıdacaq. Ona görə də baş verənlərin mən sadəcə zamana buraxılmasının tərəfdarıyam. Çünki zaman ən yaxşı müəllimdir! Baxmayaraq ki, o bütün şagirdlərini öldürür…
Ayaz Mirzəyev
