Xəbər verdiyimiz kimi, ötən tanınmış iqtisadçı Qubad İbadoğlunun oğlu Emin metronun “Koroğlu” stansiyasında şəkil çəkərkən polis nəfərləri onun telefonunu əlindən alaraq, şəkilləri siliblər.
Eurasia Diary xəbər verir ki, Q.İbadoğlu özünün “Feysbuk” hesabında oğluna qarşı polis kobudluğundan və metroda foto çəkilişə qadağanın sovet ənənəsi olaraq qalmasından şikayətlənmişdi.
Qeyd edək ki, iqtisadçı ekspert bu gün məlum məsələ ilə bağlı yeni post yazıb.
Q.İbadoğlu bildirib ki, oğlu Eminin Bakı Metropoliteninin "Koroğlu" stansiyasında polislər tərəfindən yoxlamaya məruz qalması, telefonunun əlindən alınıb, çəkdiyi şəkillərin silinməsi ilə bağlı müxtəlif reaksiyalar oldu.
“Bu barədə yazdığım posta çoxsaylı izləyicilərin yazdığı şərhlərlə yanaşı, Daxili İşlər Nazirliyinin Mətbuat Xidmətinin rəis müavini Orxan Mansurzadə də telefonuma zəng edərək, hadisənin təfərrüatları ilə maraqlandı. Metroda şəkil çəkməyin qadağan olmasının səbəbləri barədə danışdı. Fikrimcə, sovet dövründən qalan bu qadağanın ləğvini vaxtı çoxdan çatıb. Çünki bu qadağanın təhlükəsizliyin təminatı baxımından effekti qalmaylb. Hazırda Bakı metrosu adı ilə internetdə axtarış zamanı çoxsaylı video və fotolara çıxış əldə etmək mümkündür. İnformasiya və kommunikasiya texnologiyalarının inkişaf etdiyi hazırkı dövrdə metroda foto və video çəkilişlərinin qarşısını almaq mümkün deyildir. Əgər metroda internetə çıxış varsa hətta həmin obyektin şəkilini ora daxil olmadan belə kənardan da çəkmək və orda izləmə aparmaq mümkündür. Odur ki, Daxili İşlər Nazirliyinin bu məsələyə dair mövqeyini bölüşməsəm də onların operativ reaksiyasını təqdir edirəm», - deyə İbadoğlu bildirib.
Bəs metroda foto-video çəkilişlərə niyə qadağa qoyulur? Sovetdən qalmış bu qadağaya ehtiyac varmı?
Eurasia Diary bu sualla “Bakı Metropoliteni” Qapalı Səhmdar Cəmiyyətinin mətbuat xidmətinin rəhbəri Bəxtiyar Məmmədova müraciət edib.
Mətbuat katibi öncə qeyd edib ki, metropoliten strateji obyektdir və foto-video çəkilişlərə qadağa da məhz təhlükəsizliklə bağlıdır.
“Bu, tək bizdə olan nümunə deyil. Bir neçə ölkələrdə olan nümunədir. Nazirlər Kabinetinin təsdiq etdiyi “Bakı Metropolitenindən istifadə qaydaları”nda konkret və birmənalı olaraq yazılıb ki, Bakı metropoliteni rəhbərliyinin icazəsi olmadan foto, video və kino çəkilişləri aparmaq qadağandır.
Bunun üçün mütləq şəkildə “Bakı Metropoliteni” Qapalı Səhmdar Cəmiyyəti rəhbərliyinin icazəsi alınmalıdır. Yəni qayda belədir. Bunu qanun tələb edirsə, biz də yerinə yetirməyə borcluyuq. Bu şəxsiyyətlərlə bağlı məsələ deyil, sırf qanun tələbidir. Polis də öz vəzifə səlahiyyətlərini icra edir. Burda elə bir problem yoxdur. Əlində telefon, qulağında qulaqcıq olan insan yol gedərkən insanlara necə maneə olurlar? Ən sadə nümunəsini dedim. Metroda pilləkəndən düşən hər bir sərnişin də xüsusi məsuliyyət hiss etməlidir. Və bilməlidir ki, metroda təhlükəsizlik ən vacib məsələlərdən biridir. Qaydalar yazılıbsa, demək ki, bunun arxasında hər hansı bir əsas var”.
B.Məmmədov əlavə edib ki, strateji əhəmiyyətindən irəli gələn məsələlərdən savayı, metroda hərəkət təhlükəsizliyi və sərnişin rahatlığı ilə bağlı olan məsələlər də var. Onun sözlərinə görə, foto-video çəkilişlər zamanı birinci növbədə sərnişin özü xəsarət ala bilər.
“İkincisi, digər sərnişinlərə maneə yarada, onlara da xəsarət yetirə bilərsiniz. Bundan savayı, sərnişinlərin hərəkətinə mane ola, təhlükə mənbəyinə çevrilə bilərsiniz. İcazəli çəkilişlər zamanı həm çəkilişin, həm də sərnişinlərin təhlükəsizliyi nəzərə alınaraq, tədbirlər görülür. İcazəsiz olanda, indi təsəvvür edin ki, hərə bir yanda fotoşəkillər çəkəcək və ya çəkdirəcək. Sərnişin axınına mane olacağı şübhəsizdir. İnsanların rahatlığına maneə yaranacağı da qeyd-şərtsizdir. Eskalatorda, stansiya yolunda, xüsusən qatar stansiyaya daxil olanda, təhlükənin dərəcəsini təxmin etmək olar. Platformada sərnişinlərin hərəkəti konkret sağ və ya sol olaraq bölünmür. Hər bir sərnişin gedəcəyi istiqaməti özü seçir və onlara mane ola, xəsarət yetirə, narazılığı ilə üzləşə bilərsiniz. Metropoliten sərnişindaşıma vasitəsidir. Bu səbəbdən kiminsə çəkiliş aparmaq istəyi digərinin metrodan nəqliyyat vasitəsi kimi istifadə hüququna xələl gətirməməlidir. Hər hansısa stansiya ilə bağlı foto və videogörüntü əldə etmək istəyənlər zamanla çəkilmiş və istimaiyyətə açıq olanlardan da rahatlıqla istifadə edə bilər», - deyə B.Məmmədov saytımıza bildirib.
Vəfa VƏLİYEVA
