Bu gün General-mayor Hikmət Həsənovun ad günüdür.

Hikmət Həsənov 1975-ci il 9 oktyabrda Füzuli rayonunun Pirəhmədli kəndində dünyaya gəlib. Orta məktəbdə oxuduğu vaxt mənfur düşmənlərin torpaqlarımıza təcavüzü Hikmət Həsənovun hərbçi olmaq fikrini qətiləşdirmiş, məktəbi bitirib 1992-ci ildə Bakı Ali Ümumqoşun Komandirləri Məktəbinə daxil olmuşdur. Bir müddət sonra elə həmin ildə cəbhədə vəziyyətin pis olduğunu görmüş, könüllü ərizə yazaraq təhsilin yarımçıq qoyaraq doğma kəndi uğrunda döyüşlərə qatılmışdır.

1993-cü ildə Tərtərdə "N" saylı hərbi-hissədə tağım komandiri kimi xidmətə başlamışdır.

1994-cü ildə Türkiyədə Tuzla harp piyadə okulunda 6 ay kurs keçmiş,Daha sonra xidmətini Ağdamda "N" saylı briqadada aparmışdır. Bölük komandiri, tabor komandiri vəzifəsinə kimi yüksəlmişdir.

2002-ci ildə təhsilini davam etdirmək üçün Çin Xalq Azadlıq Ordusunun Nangin quru qoşunları ali hərbi akademiyasına daxil olmuş, akademiyanı xüsusi fərqlənmə ilə 1-ci bitirmiş, xüsusi döş nişanı ilə təltif olunmuşdur. 2003-cü ildə vətənə qayıdaraq Qazaxda "N" saylı hərbi hissədə briqada komandirinin MTT üzrə müavini təyin edilmiş, bir neçə ay sonra Tovuzda "N" saylı briqadanın qərargah rəisi kimi xidmətinə davam etmişdir. 2004-cü ildə Tovuz istiqamətində əsgəri Dilqəmlə erməni postunu götürdüyünə görə komandanlıq tərəfindən briqada komandiri vəzifəsinə yüksəldirmişdir. Həmin döyüşdə əsgəri Dilqəm şəhid olduğu üçün, hal-hazırda da həmin post Şəhid Dilqəmin adını daşıyır.

2005-2008-ci illərdə xidmətini Gəncədə "N" saylı briqadanın komandiri kimi davam etdirmişdir. 2008-ci ildə Silahlı Qüvvələrin Hərbi Akademiyasına daxil olmuş, 2010-cu ildə akademiyanı fərqlənmə ilə 1-ci bitirmişdir. Elə həmin il Pirəküşküldə NATO ilə tərəfdaşlıq müqaviləsinə görə Müdafiə Nazirliyi tərəfindən yaradılan NATO taborunun yerləşdiyi briqadaya komandir təyin edilmiş, NATO təlimlərində qarşıya qoyulan tapşırığı ingiliscə məruzə edən ilk Azərbaycanlı hərbçi olmuşdur.

2013-cü ildə təhsilini daha da artırmaq üçün Almaniyaya getmiş, NATO əməliyyat planlaşdırması kursunu keçmiş, NATO əməliyyat qərargahında qərargah zabiti kimi praktika keçib fəaliyyət göstərmişdir. 2014-cü ildə Azərbaycan Respublikasının Prezidenti, Ali baş komandan İlham Əliyevin sərəncamı ilə yeni yaranan, strukturu yenidən qurulan Naxçıvan Əlahiddə Ümumqoşun Ordusunun qərargah rəisi təyin edilmişdir. 2014-cü il iyunun 26-da Silahlı Qüvvələrin yaranmasının 96-cı ilində Ali baş komandanın sərəncamı ilə general-mayor rütbəsi verilmişdir.

2014-cü il dekabrın 28-də Ali baş komandanın sərəncamı ilə Silahlı Qüvvələrin ən təhlükəli, strateji postu olan "N" saylı birləşmənin komandiri təyin edilmişdir.  Birliyin artilleriya bölmələri 2015-ci ildə separatçı rejimin müstəqillik il dönümü üçün hazırladıqları poliqonu külə döndərərək erməniləri matəmə qərq etmişdi, daha sonra düşmənin 10-cu dağ atıcı diviziayasının qərargahı darma-dağın edilmişdi. Komandirliyi dövründə 2015-2017-ci illərdə düşmənə Ağdam-Tərtər-Goranboy istiqamətində ciddi itkilər verdirmiş, 2016-cı ildə aprel döyüşlərində istiqamət komandiri kimi cəbhənin 3 istiqamətdə: Ağdam-Tərtər-Goranboy cəbhəsindəki döyüşləri idarə etmişdir.

Aprel döyüşlərində rəhbərlik etdiyi döyüşdə ordumuz ilə 2 saat ərzində düşmənin 24 illik Ohanyan müdafiə xəttini yararaq Talış yüksəkliklərinə qalxmış, düşmənin 21 postunu dağıdaraq 7 strateji yüksəkliyi düşməndən təmizləmişdir.

NATO-nun Türkiyədə, Hollandiyada, Almaniyada müxtəlif kursların keçmişdir.

Hikmət Həsənov bu qədər uğurlu karyeraya sahib olsa da ölkə xaricində olduğu qədər ölkə içərisində də xeyli düşmənləri var. H.Həsənova qarşı 3 dəfə sui-qəsd təşkil edilib. Eyni zamanda general-mayora qarşı sayısız-hesabsız təxribatlar törədilib, dəfələrlə haqqında yalan xəbərlər verilib.

Tofiq ŞAHMURADOV

Nicat İSMAYILOV

Eurasia Diary