"Araz Əlizadə kimilərin çıxışları bizə həm də bir siqnaldır. Demək, ölkədə bizi işğal edə biləcək Rusiya hərbçilərini gül-çiçəklə qarşılamağa hazır olanlar hələ də çoxdur".
Eurasia Diary xəbər verir ki, bu sözləri AMEA-nın elmi işçisi, tarixçi alim Dilavər Əzimli Milli Məclisin deputatı Araz Əlizadənin İTV-də yayımlanan 3D proqramında Türkiyə-Azərbaycan münasibətlərinə kölgə salacaq qalmaqallı fikirlərinə münasibət bildirərkən deyib. Azərbaycanın müxtəlif dövlət qurumlarında Rusiyameylli şəxslərin olduğunu qeyd edən Əzimli hesab edir ki, bunlar oralardan təcrid olunmasa əlbəttə işğal hər an reallaşa bilər.
"Müstəqilliyimizdən 28 il ötür... Amma bu sahədə ideoloji bazamız çox zəifdir. Biz bu qüvvələrin qarşısına çıxmaq üçün yalnız milli ideologiya ilə silahlanmalıyıq. Millət hələ dərk etmir ki, onun ən böyük faciəsi 1813-cü ildə Gülüstan sülhündən başlayaraq 1991-ci ilədək davam etmişdir. Bu bizim son Rusiya işğal tarixidir. Millət hələ anlamır ki, bu işğal tarixi Bütöv Azərbaycanı parçaladı. Millət hələ anlamır ki, bu, Bütöv Təfəkkürü parçaladı. Böyük bir millət müxtəlif dövlətlərin ərazilərində parçalanmış şəkildə qaldı. Bu millət buna görə millətləşmə prosesini keçə bilmədi. Ona millət mühazirələrini işğalçl dövlətin tədris planı ilə tədris etdilər. Ona öz qəhrəmanlarını işğalçı kimi təqdim etdilər. İşğalçı ölkələrin qəhrəmanlarını isə ona qəhrəman kimi təqdim etdilər. Millət Babəkə, Şah İsmayıla, Nadirə, Ağa Məhəmməd şah Qacara başqa ölkələrin tədris planı əsasinda yanaşdı. Nəticə də göz qabağındadır. Millət 1991-ci ildən sonra dünyaya səs salmış möhtəşəm dövləti-Azərbaycan Cümhuriyyəti barədə xəbər tutdu. Millət hələ anlamır ki, bu Cümhuriyyətin yaradıcıları kimlərdir. Dünyada onlar kimi demokratik insanlar varmı? Millət hələ anlamır ki, M.Ə.Rəsulzadə XX əsr dünya ictimai-siyasi tarixində üç insandan biri, bəlkə də birincisidir!!! Millət anlamır ki, bu dövlətin varisi ola bilər, ya yox!!! Mən bir dəfə yazmışdım ki, biz hələ Azərbaycan Sovet Sosialist Respublikasının varisiyik. Buna görə də Araz Əlizadələri Milli Məclisə seçdirirlər. Vaxtilə üçrəngli bayrağımızı ayaq altında tapdalayanlar indi də bu bayrağı öpür. Onlar istənilən zaman başqa bayrağı, düşmən dövlətin bayrağını öpəcəkdir", - deyə D.Əzimli bildirib.