YAP Gəncə şəhər təşkilatının böyük zalında “Loqos” Psixoloji və Nitq İnkişaf Mərkəzinin psixoloqu Taciyə Mehdisoy və tanınmış bədii qiraət ustası Xəzər Süleymanlının “Unutmağın resepti” adlı görüşu keçirilib.

Eurasia Diary xəbər verir ki, tədbirə Gəncə və ətraf rayonlardan şeirə, poeziyaya, incəsənətə marağı olan yaşlı və orta nəslin nümayəndələri, gənclər qatılıb.

Psixoloq Taciyə Mehdisoy tədbirdə sözün insan psixologiyasına təsirindən bəhs edib. Bildirib ki, sözün qüdrəti danılmazdır. Əsas məsələ odur ki, yerində deyilsin. Söz dünyanın ən böyük xəzinəsidir. Elə bir xəzinə ki, xərcləndikcə çoxalır, bitib-tükənmir.

Sosial şəbəkələr vasitəsilə məhşurlaşan, xüsusən gənclərin diqqətini cəlb etməyi bacaran gənc şair, qiraətçi Xəzər Süleymanlının səsləndirdiyi şeirlər tədbirə gözəl bir ovqat bəxş edib. Gənc ifaçı Elvin Mirzəzadənin ifasında Xəzər Süleymanlının sözlərinə bəstələnən mahnı alqışlarla qarşılanıb.

AYB Gəncə bölməsinin sədri, Əməkdar mədəniyyət işçisi, şair-dramaturq Xəzangül Hüseynova çıxış edərək, şerimizin bugünkü mənzərəsi haqqında təsəvvür yaradan belə tədbirlərin böyük əhəmiyyətindən danışıb.

Səmimi ab-havada keçən görüş zamanı Xəzər Süleymanlı bir neçə yeni şeirlərini oxuyub, tamaşaçıların çoxsaylı suallarını cavablandırıb.

Geniş diskussiya şəraitində keçən görüşdə gənclər də öz şeirlərini oxuyub, ətraflı fikir mübadiləsi aparılıb.