Əlillərin möhtəşəm Qala konsert gecəsi baş tutdu - "Əlillik istedada əngəl deyil" - FOTOLAR | Eurasia Diary - ednews.net

14 Dekabr, Şənbə


Əlillərin möhtəşəm Qala konsert gecəsi baş tutdu - "Əlillik istedada əngəl deyil" - FOTOLAR

Cəmiyyət A- A A+

Əmək və Əhalinin Sosial Müdafiəsi Nazirliyinin “2019-cu ildə əlilliyi olan şəxslərin və sağlamlıq imkanları məhdud uşaqların sosial müdafiəsi və reabilitasiyası Proqramı”na uyğun olaraq keçirilən Əlilliyi olan şəxslərin VIII Ümumrespublika Bədii Yaradıcılıq Baxış-müsabiqəsi qaliblərinin iştirakı ilə “Bərabərlik” adlı Qala konsert proqramı təqdim olunub.

Azərbaycan Dövlət Akademik Musiqili Teatrında keçirilən tədbirdə Əmək və Əhalinin Sosial Müdafiəsi naziri Sahil Babayev, hökumət rəsmiləri, qeyri-hökumət qurumlarının nümayəndələri, tanınmış mədəniyyət və incəsənət xadimləri iştirak ediblər.

Tədbirdə S.Babayev əlilliyi olan istedadlı insanların iştirakı ilə keçirilən bu konsert proqramının çox maraqlı, unudulmaz bir tədbir olduğunu, bu gözəl konsert proqramının iştirakçılarına və tədbirin təşkiində əməyi olanlara öz təşəkkürün bildirib. O vurğulayıb ki, 3 Dekabr- Beynəlxalq Əlilliyi olan Şəxslər Günü ilə əlaqədar hər il həmin şəxslərlə bağlı müxtəlif formatlarda tədbirlər keçirilir. Hələ 1990-cı illərdə Ulu öndərimiz Heydər Əliyev tərəfindən bu istiqamətdə tədbirlərin əsası qoyulub, həmin vaxtlardan da  əlilliyi olan şəxslərin ümumrespublika səviyyəli bədii yaradıcılıq sərgi və baxış-müsabiqələrinin keçirilməsi artıq ənənəyə çevrilib.

Nazir Prezident cənab İlham Əliyevin əlilliyi olan şəxslərin sosial müdafiəsini, reabilitasiyasını daim diqqət mərkəzində saxladığını vurğulayıb. Elə 2019-cu ildə də dövlət başçısının fərman və sərəncamları ilə əhalinin həssas qruplarının, o cümlədən əlilliyi olan şəxslərin, sağlamlıq imkanları məhdud uşaqların sosial müdafiəsinin gücləndirilməsində, müavinət və təqaüdlərinin artırılmasında, müharibə əlillərinin mənzillə, avtomobillə təminatı istiqamətində mühüm addımlar atıldığını qeyd edib. S.Babayev əlilliyi olan şəxslərlə bağlı sosial proqramların icra olunduğunu və ildən-ilə genişləndirildiyini deyib. Nazir Birinci vitse-prezident Mehriban xanım Əliyevanın  əlilliyi olan şəxslərə, sağlamlıq imkanları məhdud uşaqlara, eyni zamanda, sosial müəssisələrin sakinlərinə xüsusi diqqət və qayğısından bəhs edib. Bu diqqət və qayğının əlilliyi olan şəxslərə, sağlamlıq imkanları məhdud uşaqlara münasibətdə həm də bir nümunə olduğunu vurğulayıb.

S.Babayev qeyd edib ki, bu tədbirdə əlilliyi olan şəxslər bir daha istedad və qabiliyyətlərini nümayiş etdirdilər. Bir daha sübut etdilər ki, əlillik qüsur deyil, öz üzərində çalışaraq, əzmini toplayaraq fiziki məhdudiyyət üzərindən daim irəliyə, uğurlara doğru irəliləyən insanlar üçün, əksinə, bir stimuldur. Onların hər birinin həyatı, güclü özünəinam hissi ilə daim uğurlar qazanmaq üçün əzmkarlıq göstərmələri neçə-neçə əlilliyi olan insanlar üçün bir örnəkdir.

Qeyd edək ki,  muğam, mahnı, rəqs, instrumental ifaçılıq, bəstəkarlıq, poeziya, bədii qiraət üzrə keçirilən Əlilliyi olan şəxslərin VIII Ümumrespublika Bədii Yaradıcılıq Baxış-müsabiqəsində 341 nəfər iştirak edib və münsiflər heyətinin qərarına əsasən onlardan 193 nəfər baxış-müsabiqənin final mərhələsində iştirak hüququ qazanıb, 25 nəfər isə baxış-müsabiqənin qalibləri olub.

Gözdən I dərəcəli əlilliyi olan Elman Süleymanovun fortopianoda ifası ilə başlayan, əməkdar mədəniyyət işçisi Leyla Quliyevanın aparıcılıq etdiyi konsert proqramı Azərbaycanda ilk dəfə olaraq əlilliyi olan şəxslərin tanınmış incəsənət ustaları ilə eyni səhnəni bölüşərək duetlər ifa etmələri əsasında təşkil olunub.  Bəhlul Əliyevin və Elnarə Xəlilovanın, Ayşən Padarova və Pərviz Qasımovun, Mehman Çingizoğlu və əməkdar artist Nuriyyə Hüseynovanın, Gülnar Novruzova və Sənan Əliyevin,  Qəndaf Əkbərli və İbrahim Məmmədovun, Sadiq Həsənov və xalq artisti Gülyaz Məmmədovanın, Aysel Əlizadə və xalq artisti Samir Cəfərovun, Gülnar Rəhimova və Elvin Abdullayevin, Fatimə Savalanova və əməkdar artist Gülüstan Əliyevanın, Mətanət Quliyeva və əməkdar artist Nicat Kazımovun, Seymur Əliyev və Elnur Məmmədovun, Suma Tapdıqova və xalq artisti Gülyanaq Məmmədovanın ifasında duet formatında təqdim edilən mahnı və rəqslər, bədii yaradıcılıq numunələri  tamaşaçılar tərəfindən böyük maraqla qarşılanıb.

Qala konsertinin sonunda baxış-müsabiqəsi qaliblərinə diplom və mükafatlar təqdim edilib.   Baxış-müsabiqəsinin digər iştirakçılarına da həvəsləndirici təşəkkürnamə və mükafatlar verilməsi nəzərdə tutulub. 

Tədbir bütün əlilliyi olan şəxslərin ifasında “Yaşa Azərbaycan” mahnısının ifası ilə yekunlaşıb.

Tədbirdə tamaşaçı qismində iştirak edən bəzi ictiamiyyət nümayəndələri təəsüratlarını Eurasia Diary ilə bölüşüblər.

 

Beynəlxalq Avrasiya Mətbuat Fondunun (BAMF) prezidenti, Mətbuat Şurasının sədr müavini Umud Mirzəyev:

Ümumiyyətlə, əlil olmağı, əlil omadan başa düşmək, onların qayğı və problemlərini anlamaq çətindir. Çünki əlillərin problemləri sadəcə fiziki qüsurlarından ibarət deyil. Əlillərin əsas problemi onların cəmiyyət həyatında aktiv iştirak edə bilməməsi və onların cəmiyyətdən təcrid olunmasının yaratdığı ağır sosio-psixoloji durumdur. Dünənki tədbir qeyd etdiyim bu problemin həll edilmə yollarının göstərilməsi, əlil olmuş vətəndaşlarımızın cəmiyyətə yenidən qazandırılması, əlilliyin heç də həyatın sonu olmaması və əlilliyin istedadların nümayiş etdirilməsinə əngəl ola bilməyəcəyini təbliğ etmək baxımından mükəmməl idi. Mən belə hesab edirəm ki, bu tədbir əlillər üçün ciddi motivasiya mənbəyi, əlilliyi başa düşmək adına cəmiyyət üçün əhəmiyyətli maarifləndirici təlim idi.

Tədbirə Faiq Sücəddinov, Fikrət Qoca, Cəmilə Bayramova, Mənsum İbrahimov, İntiqam Soltanov kimi dəyərli və xalq tərəfindən tanınan, sevilən simaların münsiflər heyətinin üzvü kimi qatılması konsertin professional təşkilini təmin etdi. Yalnız münsiflər deyil, iştirakçılar da professional idi. Muğam ifaçısı Rübabə Mahmudovun ifası məni və elə bilirəm bütün tamaşaçıları valeh etdi, kövrəltdi. Həmçinin konsertdə əlil iştirakçılarla təşkil edilən duetlər bizi valeh etdi. Sadəcə möhtəşəm, duyğulu bir konsert idi.

 Tədbirin ərsəyə gəlməsində əməyi olan hər kəsə,  başda ƏƏSM naziri Sahil Babayev olmaqla dərin minnətdarlığımı bildirirəm.

 

“Vətəndaşların Sosial Rifahı Naminə” ictimai birliyinin sədri İradə Rızazadə:

Əvvəla, onu deyim ki, son zamanlarda izlədiyim ən möhtəşəm konsertlərdən biri idi. Münsiflər iştirakçı əlillərlə məşqlər etmişdi və bu nəticədə belə mükəmməl konsert ərsəyə gəlməsinə səbəb oldu.

Məncə, konsetdə çıxışlar edən, bizə möhtəşəm anlar yaşadan bu insanlar nümunədir, utanan, özünə qapanan əlillər üçün bir sadəcə nümunə...

 Belə istedadlı əlillərimiz cəmiyyətdən uzaqlaşmış bütün əlillərdə stimul yaratmalıdır. Tədbirdə keçirdiyim hisləri sözlə ifadə etmək mümkün deyil.

Əlillərə qayğı günü gündən artır. Prezidentin, ƏƏSM nazirliyinin dəstəyi, vətəndaş cəmiyyəti insitutlarını da hərəkətə keçirib və bu gün əlillərin cəmiyyətə inteqrasiyası işi böyük bir uğurla həyata keçirilir. Bu məncə ən əsas məsələdir.

Konsertdə əlillərimiz mükəmməl performans sərgilədilər. Onların əlil olduğunu müəyyən etməm mümkün deyildi.

Əlillərimizin bundan sonra da maarifləndirilməsi intensivləşməlidir, bu işlər görülür, lakin dah da genişləndirilməlidir. Əlillərimizə işləyə biləcəklərini, öz bacarıqlarını üzə çıxara biləcəklərini başa salmalıyıq. Biz onlara bu marifləndirmə işində dəstək olmalıyıq.

 

“Beyləqan Gənclərinin Maarifləndirilməsi və Sosial İnkişafı” İctimai Birliyinin sədri Zaur Quliyev:

Qala konserti çox maraqlı tədbir idi. 3 dekabr əlilliyi olan şəxslər günündə konsertin iştirakçıları bir daha sübt etdilər ki, onların əlilliyi onlar üçün heç də məhdudiyyət təşkil etmir. Əksinə onlar öz üzərində intensiv çalışanda çox böyük nəticələr əldə edə bilirlər.

Xüsusilə də məşhur simaların tədbirə qatılması, dəstək verməsi tədbirin  ictimailəşməsinə kömək etdi. Tədbirdə də qeyd edildiyi kimi 3 dekabr əlil şəxslər üçün bayram günü deyil, bu gün, əlilliyə və əlil şəxslərin problemlərinə diqqətin artırılması günüdür.

Dünənki tədbirdə əlilliyi olan şəxslər birdaha mesaj verdilər ki, onlar cəmiyyətin bir parçasıdır, cəmiyyətin tərkib hissəsidir və onlar da öz istedadlarını üzər çıxarmaq imkanlarına sahibdirlər.

Bu il daha çox sosial islahatlar ilidir. Əlillərin həm evlə, avtomabillə təmin edilməsi, 1 iyunda prezidentin sağlamlıq imkanları məhdud olan uşaqlara və digər şəxslərə ünvanlanan sosial xidmətlərin genişlənidirilməsi ilə bağlı əlavə vəsait ayrıması, sosial xidmət mərkəzlərinin sayının artırılması və s. bütün bunlar ölkədə əlillərə dövlət qayğısının daha da genişləndiyini, əlillərin günü-gündən daha çox cəmiyyətə inteqrasiya olunduğunu sübut edir.

 

“Mina Qurbanlarının Sosial və İqtisadi Problemlərinin Həllinə Kömək” İctimai Birliyinin sədri Məmmədhəsən Həsənov:

Dünənki konsertin əlilliyi olan şəxslərin konserti olduğunu demək çətindir. Respublikada ən məşhur müğənnilərin, incəsənət xadimlərinin konseti bu cür professional təşkil edilmir. Bu konsertin ərsəyə gəlməsində və bu səviyyədə həyata keçirilməsində ƏƏSM naziri Sahil Babayevin xüsusi rolu olub.

Bu inanılmaz bir konsert idi, heç kim ayrılmaq istəmirdi, hamı çox duyğulanmışdı. Xüsusilə gözündən əlil xanım, Rübabə Mahmudovanın muğam ifasında hər kəs, hətta cənab nazir belə kövrəldi. Bu konsert ölkə tarixində ən mükəmməl tədbirlərdən biri oldu, tarixə düşdü...

 

Qarabağ Qazisi, jurnalist Rey kərimoğlu

Dünənki tədbir sözün həqiqi mənasında mükəmməl idi. Mən illərdir həm əlillərlə çalışan bir təşkilatın nümayəndəsi, həm də bir əlil kimi müxtəlif tədbirlərdə iştirak etmişdim, lakin bu tədbir qədər möhdəşəm və hədəfə çatan, lazımlı mesajları cəmiyyətə çatdıran başqa bir tədbir görməmişdim, bu ən gözəli idi.

Əlil deyəndə insanlarda yazıqlıq, məyusluq təəsüratı yaranırdı, buna səbəb əlilliklə bağlı keçirilən əksər tədbnirlərin bu şəkildə baş tutması idi. Çox maraqlı proqram hazırlamışdılar, hər proqram bir mesaj idi. Məsələn orada əlil arabasından istifadə edən şəxslərin şəhərdə hərəkət edərəkən üzləşdikləri problemləri əks etdirən bir proqram oldu ki, onu çox bəyəndim. Əlillərin musiqi yarışmaları oldu, xüsusən duetlər çox gözəl təşkil olunmuşdu.

Əlillərin maarifləndirilməsi, onlarla bağlı problemlərin, qayğıların cəmiyyətə çatdırılması baxımından çox maraqlı və gərəkli bir tədbir idi. Bu tədbirdə əyani şəkildə göstərilirdi ki, əlil olmaq qüsurlu olmaq, cəmiyyətə yararsız olmaq anlamına gəlmir. Əksinə əlillərin də istedadlarını nümayiş etdirmək, inkişaf etdirmək şansları var. Mən çox arzu edərdim ki, bu və bunun kimi tədbirlər ölkədək televiziyalarda nümayiş etdirilsin. Beynəlxalq ictimaiyyətə çatdırılacaq bir tədbir idi. Başda Sahil Babayev olmaqla dünənki tədbirin bütün təşkilatçılarına təşəkkür edirəm. Nəhayət ki, azərbaycanda da dünya səviyyəli muasir dövrün tələbatlarına cavab verən bir proqram təşkil edildi.

 

1

1

1

1

1

1

1

1

1

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan


Загрузка...