Bugün İnsan Hüquqları Gününü qeyd etmək üçün BMT-nin Azərbaycandakı nümayəndəliyi, Gənclər və İdman Nazirliyi və İnsan Hüquqları üzrə Müvəkkilin ofisi (Ombudsman) Sabunçu Gənclər Evində sərgi təşkil edib.

İnsan Hüquqları Gününün builki mövzusu gəncləri insan hüquqları uğrunda daha fəal olmağa çağırır. Bu mövzuya həsr olunmuş tədbir dövlət qurumları, vətəndaş cəmiyyəti, diplomatik missiyalar, gənclər təşkilatları və KİV-in 150-yə yaxın nümayəndəsini bir araya gətirib.

Eurasia Diary xəbər verir ki, tədbirin açılış sessiyasında həmçinin Azərbaycan Respublikasının İnsan Hqüuqları üzrə Müvəkkili Səbinə Əliyeva və Ailə, Qadın və Uşaq məsələləri üzrə Dövlət Komitəsinin sədr müavini Sədaqət Qəhrəmanova çıxış ediblər. BMT-nin baş katibi Antonio Quterreş və BMT-nin İnsan hüquqları üzrə ali komissarı Mişel Baçelenin video müraciətləri nümayiş olunub.

BMT-nin Azərbaycandakı rezident əlaqələndiricisi Qulam İsaqzai bildirib: “İnsan hüquqları uğrunda fəal ol” ümumdünya çağırışı ilə biz dəyişikliyin konstruktiv qüvvəsi kimi gənclərin potensialını qeyd etmək, onların təsirini artırmaq, eləcə də qlobal auditoriyanın dairələrini insan hüquqlarının təşviqi və müdafiəsinə cəlb etmək istəyirik“.

Cənab İsaqzai, həmçinin Dayanıqlı İnkişaf Məqsədlərinə nail olma işində və daha yaxşı dünya üçün yeni ideya və həllərin gətirilməsində gənclərin vacib rolunu qeyd edib.

Tədbirdə çıxış edən Ombudsman Səbinə Əliyeva qeyd edib ki, bu zamana qədər İnsan hüquqları sahəsində çoxsaylı konvensiyalar qəbul olunub.

Onun sözlərinə görə, bu sahədə beynəlxalq qanunvericiliyin əsasını 1948-ci ildə qəbul edilmiş Ümumdünya İnsan Hüquqları Bəyannaməsi təşkil edir.

“İrqindən, cinsindən, etiqadından asılı olmayaraq hər kəsi təmsil edən bu bəyannamə ümumbəşəri ideyaları təmsil etməklə yanaşı bir çox qanunverici baza üçün əsas olmuşdur. Bir çox ölkələrin konstitusiyalarında bu sənədə istinad edilmişdir. Hüquqi dövlətin mühüm prinsiplərindən biri insan hüquq və azadlıqlarının təminatıdır”, deyə o bildirib.

S.Əliyeva bildirib ki, Azərbaycanda hüquqi dövlət quruculuğu prosesindən keçilmiş, qanunvericilik bazası, səmərəli hüquq müdafiə mexanizmləri yaradılmışdır.

“1998-ci ildə ölkəmizdə insan hüquqlarının müdafiəsinə dair dövlət proqramı təsdiq edilmişdir. 2007-ci ldə ölkə prezidentinin qərarı ilə həmin dövlət proqramının qəbul edildiyi gün   Azərbaycanda İnsan Hüquqları Günü elan edilmişdir. Milli fəaliyyət proqramının hazırlanması zamanı bir çox ölkələrin, həmçinin BMT-nin müvafiq təcrübəsindən istifadə olunmuşdur. Azərbaycan Respublikası Prezidentinin fərmanı ilə Azərbaycan Respublikası Hökuməti ilə Birləşmiş Millətlər Təşkilatının İnkişaf Proqramı arasında qlobal siyasi müzakirələrdə gənclərin fəal iştirakını dəstəkləmək üçün layihə sənədi təsdiqlənmişdir".

Tədbir Ümumdünya Hüquqları Bəyannaməsinə həsr olunmuş karikatura və illustrasiyaların sərgisi ilə davam edib. Sərgidə həmçinin posterlər və insan hüquqlarının daha yaxşı icrasına dair gənclərin mesajlarının əks etdirən videolar nümayiş olunub. Bununla yanaşı, ziyarətçilərə BMT agentliklərinin dərc etdiyi müxtəlif nəşr və tədris materialları ilə tanış olub və əldə etmək imkanı verilib.

Sonda İnsan hüquq və azadlıqları mövzusunda keçirilən rəsm müsabiqəsinin qalibləri təltif olunub.