Bu gün Uşaqların Beynəlxalq Müdafiəsi Günüdür. 1 iyunun uşaqların müdafiəsi günü 1950-ci ildə BMT Baş Assambleyası tərəfindən qeyd olunması qərara alınıb. Bu gün dünyanın əksər ölkələrində olduğu kimi, Azərbaycanda da qeyd olunur. Dünyada baş verən müharibələrdə isə təəssüf ki, uşaqlar da qətlə yetirildi. Qarabağ savaşı zamanı Ermənistan müharibənin qaydalarını pozaraq, məsum, günahsız uşaqları da qətlə yetirməkdən çəkinmədi.
EDNews.net Moderator.az-a istinadən Ermənistan tərəfindən öldürülən bir neçə azərbaycanlı uşaqların adlarını təqdim edir:
Səkkiz yaşlı Fariz Arzu oğlu Bədəlov 2011-ci il martın 8-də erməni snayperi tərəfindən həyətlərində qətlə yetirilib. Ailənin tək övladı olan Fariz, atası idi, onu babası böyüdürdü. Nənəsi Məlahət Bədəlova isə hadisəylə bağlı bunları deyib: “Soyuq 8 mart günü idi, hava soyuq olduğu üçün Farizi həyətə çıxmağa qoymurduq, amma oynamaq istəyirdi. Həyətə çıxan kimi də güllə ilə vurdular. Xəstəxanaya aparsaq da, onun həyatını xilas etmək mümkün olmadı”.
Nənəsiylə birlikdə qətlə yetirilən on dörd aylıq Zəhra Quliyeva da heç həyata nə üçün gəldiyini anlaya bilmədi. 2016-cı il fevralın 13-də Füzuli rayonunun Alxanlı qəsəbəsində dünyaya gələn Zəhra, 2017-ci il iyulun 4-də saat 20:40 radələrində ermənilərin Alxanlı qəsəbəsini atəşə tutması zamanı nənəsi Sahibə Quliyeva ilə birlikdə qətlə yetirilib.
2016-cı il Şanlı aprel döyüşləri zamanı məğlubiyyətə uğrayan ermənilər bu dəfə yenə hədəf mülki insanları və uşaqları seçmişdilər. Həmin vaxt ermənilərin Tərtərin Həsənqaya kəndini atəşə tutması zamanı 2000-ci il təvəllüdlü Kəlbəcər sakini Həsənli Turanə Kamandar qızı qətlə yetirilib.
Qeyd edək ki, Ermənistan-Azərbaycan Dağlıq Qarabağ müharibəsi zamanı 193 azərbaycanlı uşaq ermənilər tərəfindən qətlə yetirilib, 71 uşaq isə itkin düşüb, 29 uşaq isə hələ də girovluqdadır. Xocalı faciəsi zamanı qətlə yetirilən 613 nəfər dinc sakinin 63-ü, yaralanan 487 nəfərdən isə 76-sı uşaq olub. Xocalı faciəsi zamanı 155 uşaq bir və ya hər iki valideynini itirib. Ermənistan silahlı birləşmələri tərəfindən 1992-ci il fevralın 17-də törədilən Qaradağlı faciəsi zamanı isə səkkizi məktəbli olmaqla 91 nəfər dinc sakin qətlə yetirilib, 146 uşaq yetim qalıb.
Ermənistan bu gün də heç bir beynəlxalq hüquqi sənədlərə məhəl qoyamaraq günahsız uşaqları qətlə yetirməkdə davam edir.
Vasif Əlihüseyn / Moderator.az