Azərbaycanda yerləşən və BMT ECOSOC yanında Əsas Məşvərətçi statusa malik Beynəlxalq Avrasiya Mətbuat Fondunun (BAMF) prezidenti Umud Mirzəyev özü və təşkilatı adından Yunus Mərkəzinin təşəbbüsü ilə COVID-19 peyvəndlərinin bütün dünyada hər kəsə əlçatan olması üçün çağırışa imza atıb.
EDNews.net xəbər verir ki, dünyaca məşhur görkəmli iqtisadçı, Nobel Sülh Mükafatı laureatı, prof. Məhəmməd Yunusun təşəbbüsü olan birgə müraciət bütün qlobal liderlərə, beynəlxalq təşkilatlara və hökumətlərə hüquqi tədbirlər görməyi və COVID-19 peyvəndlərinin qlobal istifadəsi üçün patent hüququndan azad edilməsinə dair rəsmi açıqlamalar verməyi təklif edir. Hal-hazırda 19 Nobel mükafatı laureatı, 36 keçmiş dövlət və hökumət başçısı, siyasi liderlər, sənətçilər, beynəlxalq QHT və təsisatlar daxil olmaqla 114 dünya lideri, Yunus Mərkəzinin təşəbbüsü ilə COVID-19 peyvəndlərinin hamı tərəfindən istifadəsinə şərait yaradılması üçün müraciət imzalayıblar.
M.Yunus öz mesajında bildirmişdir ki, birgə müraciətdə hökumətlər, fondlar, xeyriyyəçilər və sosial müəssisələr peyvəndlərin bütün dünyada pulsuz istehsalı və ya yayılması üçün təşəbbüslə çıxış etməyə çağırılır.
“Bütün sosial, siyasi və səhiyyə qurumlarını, dünyada həssas təbəqədən olan şəxslərin heç bir ayrıseçkilik edilmədən qorunması üçün kollektiv səyimizi bir araya qoymağa dəvət edirik.
COVID-19 pandemiyası hər bir ölkədə səhiyyə sistemlərinin güclü və zəif tərəflərini açıq şəkildə nümayiş etdirir və səhiyyə xidmətlərində qarşıya çıxan maneələri və qeyri-bərabərliyi büruzə verir. Qarşıdakı peyvənd kampaniyasının effektivliyi onun universallığından asılı olacaq".
İmza edənlər Birləşmiş Millətlər Təşkilatının Baş katibi, Ümumdünya Səhiyyə Təşkilatının baş direktoru, dini liderlər, sosial və mənəvi liderlər, tədqiqat laboratoriyaları və əczaçılıq şirkətlərinin rəhbərləri daxil olmaqla, bütün dünya liderlərindən və mediadan həmrəylik nümayiş etdirmələrini xahiş edir, biz Covid-19 peyvəndi hazır olduqda əlçatanlığının təmin edilməsi barədə qlobal olaraq ümumi razılığa sahibik.
BAMF hamının pulsuz peyvənd əldə etmək hüququnu təmin etmək üçün http://www.vaccinecommongood.org// səhifəsindən müraciətə qoşulmağa dəvət edir.
