SOS: - Karantin rejimində oğurluq cinayətləri kəskin artıb | Eurasia Diary - ednews.net

5 Avqust, Çərşənbə


SOS: - Karantin rejimində oğurluq cinayətləri kəskin artıb

Cəmiyyət A- A A+

Karantin rejiminin davamlı olaraq uzadılması COVID-19-a yoluxma riskini azaltmaqla bərabər bütün sahələrdə ciddi problemlərə yol açıb. Son günlərdə isə “problemlər zənciri”nə oğurluq cinayətlərinin kəskin şəkildə artması əlavə olunub.

Pandemiya dövründə tətbiq olunan karantin rejimi dövründə insanların iş yerlərindən məhrum olması, bank kreditləri, alimentlər üzrə yığılan borclar cinayət hallarının artmasına səbəb ola bilər. Oğrular yaxşı bilirlər ki, necə deyərlər, pis sülh yaxşı müharibədən daha yaxşıdır. Bunu sosioloq Zəminə Səfərova EDNews.net-ə açıqlamasında deyib.  

Yeri gəlmişkən, pandemiya zamanı insanlar evdə otururlar. Bəziləri isə bağ evlərinə köçüblər. Sahibsiz evlərə hər zaman oğrular daha çox maraqlı olublar. Belə oğruların məqsədi çox zaman insanlara xəsarət yetirmək deyil, bahalı əşyalar, pul, qızıl, avtomobil əldə etməkdir. Bu kimi hallar həmişə hər zaman bütün dünyada baş verib. Boş mənzillərə girməyə cəhdlər ola bilər, lakin siqnalizasiya sisteminə qoşulmuş təhlükəsizlik cihazı  reaksiya verdiyi zaman qarətçilər ələ düşməmək üçün cinayət yerini tələsik tərk edə bilərlər. Odur ki, evlərdə təhlükəsizlik cihazları quraşdırılması tövsiyə olunur.

İnsanların uzun müddət təcrid vəziyyətində olmaları və depressiyaya düşmələri ilə əlaqədar məişət zorakılığı faktları da tez-tez baş verir. Son günlər ürək çatışmazlığından dünyasını dəyişənlərin sayı artıbdır. Bu onu təsdiq edir ki, insanlar depressiya vəziyyətində, qorxu-həyəcan, təşviş içindədirlər. Buna səbəb maddiyatın olmaması, işsizlik, ailənin ağır duruma düşməsi, yoxsulluq, ümidsizlik, qorxu, həyəcandır. Nəticədə ürək tab gətirmir və buna görə ölüm halları baş verir.

Əgər bu belə davam edərsə, daha çox oğurluq halları baş verə bilər. Məsələn ərzaq oğrularının sayı çoxala bilər. Bilirsiniz ki, aclıq insanları daha çox aqressiv edə bilər. Allah eləməsin o hala düşək. Əgər hamı evdə oturursa, rayon-kəndlərdə təsərrüfat işləri dayanıbsa, meyvə-tərəvəz, əkin yoxdursa sonda aclıqla imtahan oluna bilərik. Bildiyimizə görə su qıtlığı yaranmağa başlayıb. Su olmayan yerdə həyat da olmur. Biz bütün bu gedişatı ciddiyə almalıyıq. Çünki bəlkə də bizi çox gözəl günlər, yaxud da daha çox çətin günlər gözləyir. Odur ki, hamılıqla bu kimi problemlərlə üzləşməmək üçün ağılla, şüurla, uzaqgörənliklə addımlar atmalıyıq.

Yeri gələrsə daha sərt qaydalar qoyulmasına razılaşmalıyıq. Əlbəttə əhalinin xeyrinə olacaq qaydalar qoyulsun. Ən əsası qaydalara əməl etmək və məsuliyyətli olmalıyıq.

Hesab edirəm ki, dövlət cinayət artımının qarşısını almaq üçün pandemiya dövründə əhalinin bir hissəsinin iş yerlərini itirməsini, heç bir sosial yardım almayanları nəzərə alaraq, bank kreditləri və alimentlər üzrə ödənişləri dondurmalıdır, kommunal xərclərdə güzəştlər edilməlidir, ərzaqların qiymətinin artmamasına ciddi nəzarət olmalıdır, bəzi dərman məhsulları pulsuz və nisbətən ucuz satılmalıdır, pullu xidmətlərdə güzəştlər edilməlidir. Əks təqdirdə, bu əməllərə düzgün nəzarət edilməzsə icra məmurları tərəfindən borclulara olan təzyiq onları müxtəlif cinayətlərə təhrik edəcək.

EDNews.net

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan


Загрузка...