Xəbər verdiyimiz kimi, Azərbaycanın müharibədən zərərçəkən regionlarında fəaliyyət göstərən bir qrup vətəndaş cəmiyyəti təşkilatı dünyaca məşhur www.change.org saytında Ermənistana qarşı petisiyaya ilə çıxış edib.
Petisiya həmin sənədə istinad edərək dünya dövlətlərini, beynəlxalq təşkilatları, media qurumlarını Azərbaycanın üzləşdiyi mina probleminə yönəltmək üçün çoxsaylı insanların change.org saytında birgə etiraz çağırışıdır. Petisiya bir gün ərzində 2 mindən çox səs toplayıb.
Petisiyanın əsas təşəbbüsçülərindən olan BMT-nin İqtisadi Sosial Şurasının (ECOSOC) Əsas Məşvərətçi Statuslu üzvü olan Beynəlxalq Avrasiya Mətbuat Fondunun prezidenti Umud Mirzəyev vətəndaşları petisiyanın imzalanmasında fəallıq nümayiş etdirməyə çağırıb.
“Fəallıq bizim özümüzdən, insanlarımızdan asılıdır. Diasporumuz, yerli, eləcə də xarici ölkələrdə təhsil alan tələbələrimiz, diplomatlarımız, dövlət və qeyri-dövlət sektorunda çalışan hər kəs bu petisiyaya səs verməyi özünə öhdəlik bilməlidir. Bu təkcə mənim, sənin və ya bir başqasının işi deyil. Bu ümummilli bir işdir. Azərbaycan sevdalısı olan hər kəs petisiyanın daha çox yayılmasına və daha çox dəstəklənməsinə kömək olmalıdır”, deyə Fondun rəhbəri qeyd edib.
Qeyd edək ki, dünyaca ünlü change.org saytının yarım milyarda yaxın abunəçisi vardır. Sayt üzərindən qaldırılmış məsələlər 196 ölkədə 72.807 uğura nail olub.
Azərbaycan vətəndaşları da https://www.change.org/p/republic-of-armenia-urge-armenia-release-the-map-of-landmines-in-liberated-areas-of-azerbaijan-to-save-lives saytına daxil olub, petisiyaya imza ata bilər. Bu petisiyanı imzalamaqla Ermənistanı minalanmış ərazilərə dair xəritələri üzə çıxartmağa çağırmağınız çox sayda günahsız insan itkisinin qarşısını ala bilər. Bu insanların zərərsizləşdirilməsi mümkün olan həmin minalara düşərək həyatlarını itirmək və ağır yaralanmaq qorxusu olmadan yaşamaq hüququ vardır.
Petisiya Azərbaycanın Dağlıq Qarabağ və ətraf rayonlarının təxminən otuz illik işğalı, habelə münaqişənin bitməsindən sonrakı dövrdə Ermənistan hərbi birləşmələrinin geri çəkildiyi zaman bu əraziləri ciddi şəkildə minalaması və minalanmış ərazilərin xəritələrini verməkdən imtina etməsinə qarşı etiraz çağırışıdır. Sənəddə deyilir: “Ermənistan bu minaların harada qoyulduğunu bilir, lakin bu məlumatları yaymaqdan imtina edir. Məcburi köçkün ailələrini qorxu içində saxlayaraq öz evlərinə qayıtmasına əngəl olmağa çalışan Ermənistan bu sirrin açarını gizlədir”.