“Bu fərman Azərbaycanda vətəndaş cəmiyyəti qurumlarının inkişaf etdirilməsi üçün həyata keçirilən ardıcıl siyasətin bariz nümunəsidir”. Bunu Beynəlxalq Avrasiya Mətbuat Fondunun prezidenti Umud Mirzəyev Azərbaycan Prezidenti İlham Əliyevin “Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi” publik hüquqi şəxs yaradılması barədə fərmanını Eurasia Diary-yə şərh edərkən deyib.
O, bildirib ki, bu gün QHT-lərin dövlətin və cəmiyyətin həyatında rolu durmadan artır: “QHT-lərin fəaliyyətini yeni dövrün çağırışlarına uyğunlaşdırmaq lazımdır. Bu gün Azərbaycanın əraziləri 30 illik işğaldan azad olunub. Qarabağa qayıdış, Azərbaycanın beynəlxalq aləmdə tanıdılması, onun haqda obyektiv məlumatların yayılması baxımdan vətəndaş cəmiyyəti qurumlarının üzərinə öhdəliklər düşür. Yeni yaradılan Agentlik bu fəaliyyətlərin həyata keçirilməsi üçün Azərbaycanda qeyri-hökumət təşkilatlarına ciddi dəstək olacaq. Agentlik bu institutların inkişaf etdirilməsi və beynəlxalq əlaqələrinin möhkəmlənməsinə bilavasitə imkan yaradacaq, struktur və qurum olaraq dəstək verə biləcək”.
Onun sözlərinə görə, dünyada vətəndaş cəmiyyətinin inkişafı şəffaflığın, insan hüquqlarının və söz azadlığı ilə bağlı bir prosesdir: “Azərbaycanda vətəndaş cəmiyyəti qurumlarının rolu günbəgün artır. Vətəndaş cəmiyyəti institutları Azərbaycanda vətəndaş cəmiyyətinin formalaşmasında, ictimai nəzarətin təşkilində ən vacib institutlardan biridir. Publik hüquqi şəxsin yaranmasına da ehtiyac burdan doğdu. Yeni strukturun imkanları daha geniş olmaqla, daha çevik idarəetmə mexanizminə malik olacaq. Hesab edirəm ki, belə bir strukturun yaranması həm maliyyə resurslarının genişlənməsi, həm təşkilati dəstəyin artması baxımdan Azərbaycanda vətəndaş cəmiyyəti institutları üçün çox önəmli bir hadisədir”.
U.Mirzəyev buna qədər mövcud olan Qeyri-Hökumət Təşkilatlarına Dövlət Dəstəyi Şurasının fəaliyyətinə də toxunub. Bildirib ki, 2007-ci ildə QHT-lərə Dövlət Dəstəyi Şurasının yaradılması ilə bağlı ölkə prezidentinin qərarı o zaman üçün bir ilk olub: "İndiyədək vətəndaş cəmiyyəti qurumlarına belə bir dəstək göstərilməmişdi. Şura 14 il ərzində həm texniki, həm də maliyyə dəstəyi göstərdi. Buna qədər Azərbaycanda QHT-lər donorlardan dəstək alırdı və beynəlxalq qurumların maliyyələşdirdiyi layihələr əsasında fəaliyyət göstərirdi. Bu fərmanla ilk dəfə Azərbaycan vətəndaş qurumları hökumətin dəstəyini əldə etdi. Agentlik QHT-lərə Dövlət Dəstəyi Şurasından fərqli olaraq, daha ciddi resurslara malik olacaq. Agentliyin imkanları Şuradan çoxdur və vətəndaş cəmiyyəti institutlarının inkişafı üçün yeni imkanlar yaradacaq”.