Azərbaycan Dövlət İqtisad Universitetinin (UNEC) təşkilatçılığı ilə həyata keçirilən UNEC İqtisadi Forumu-2021 işini davam etdirir. Devizi "Zəfər Yolu" olan və Azərbaycanın dövlət müstəqilliyinin bərpasının 30 illiyinə həsr edilən forum 5 panel üzrə davam etməkdədir. EDNews.net xəbər verir ki, Forumun 4-cü – Post-pandemiya dövründə biznes transformasiyası panelində Nobel Sülh Mükafatı laureatı, professor Məhəmməd Yunus online çıxış edib.
Həmin çıxışın əsas hissəsini sizlərə təqdim edirik.
“İlk öncə məni pandemiyanın səbəb olduğu belə bir çətin dönəmdə bura dəvət edib, söz verdiyiniz üçün təşəkkürümü bildirirəm. Onu da qeyd edim ki, bu çətin prosesdə Qlobal İstiləşmə də gündəlikdə əsas prioritetlərdən biri kimi yer almaqdadır.
Əslində sizə deyim ki, pandemiya bir qlobal düşmən kimi üzərimizə hücum edərkən, biz qlobal şəkildə buna qarşı necə mübarizə aparmağın metodunu kəşf etdik. Pandemiya dünyanı büsbütün bürüdüyü bir dönəmdə, həm də bizim bir araya toplanmağımızın vacib olduğunu bizə öyrətdi.
Onu da əlavə edim ki, böyük bir bəla üzərimizə gələrkən, dünyamız təcrid olunmuş ada kimi parçalanmışdı. Əslində, belə bir vəziyyətdə dünyamız yumruq kimi birləşməli idi. Birimiz digərimizin halından xəbərsiz idik və o biri adada nə baş verdiyi bizi maraqlandırmırdı. Proseslər davam etdikcə, ortaya peyvənd olunma fikri gəldi. Ancaq burada da həmrəylik nümayiş etdirə bilmədik. Hər kəs birləşərək mübarizə aparmaq yerinə, hər bir tərəf özü-özlüyündə peyvənd icad etmək qərarını verdi. Həkimlər kritik durumda olan xəstələr qarşısında aciz duruma düşdü və insanları talelərinin ümidinə buraxdı.
Belə bir vaxtda insan həyatı biznesdən arxa plana keçdi. Hər kəs mənfəət əldə etmək naminə öz patenti ilə istehsal etdiyi peyvəndləri təbliğ etməyə başladı. Bir sözlə, gəlirə olan böyük həvəsimiz bizi elmdə inkişaf etməkdən məhrum etdi.
Bundan əlavə, dünyanın hazırda cəmi 10 ölkəsi peyvənd olunmanı uğurla həyata keçirib. Qalan ölkələrin əhalisi kifayət qədər peyvənd olunmadığı üçün demək olar ki, risk qarşısındadır”.
Məhəmməd Yunus çıxışı zamanı Qlobal İstiləşmə probleminə də toxunub.
O, dünyanın eqoizmə düçar olması səbəbindən təbiətimizin məhvə doğru getdiyini vurğulayıb. Məhəmməd Yunus bunu dünyada qlobal işsizliyin artması ilə də əlaqələndirib. O, pandemiya dönəmində artan işsizliyi həm də sənaye inqilabının dırnaqarası uğuru kimi adlandırıb.
“Biz pandemiyadan sonra sənaye sahəsində əldə etdiyimiz uğurlarla öyünməyə başladıq. Süni intellekti artırmaqla insanları əməkdən kənarlaşdırdıq.
Təbii ki, süni intellektin sayəsində xeyli gəlir əldə etmək mümkündür. Çünki on insanın görəcəyi işi bir robot texnologiyası daha sürətlə həyata keçirə bilir. Belə olduqda insanların funksiyası azalır və işsizlər kütləsi yaranır. Hətta iş o yerə çatıb ki, robot texnologiyası professor olan bir insanı ötüb keçə bilib. Ümumiyyətlə, süni intellekt elmin və həyatımızın hər sahəsinə nüfuz edib. Bəs biz indi hara doğru gedirik? İşsizlər kütləsinəmi doğru. Bu mənim həyata baxış perspektivim deyil. Bununla mübarizə aparmaq üçün mən yeni dünya qurmağı, yəni “3Zero” (3Sıfır) dünyasını inşa etməyi təklif edirəm. Bu dünya sıfır karbon qazı, sıfır sərvətin bir əldə təmərküzləşməsi və sıfır işsizlikdir.
Biz yeni dünyamızda insanların daxili potensialının üzə çıxmasına yardım etməli və onların hər birinin sahibkar və iş adamı olmasına şərait yaratmalıyıq”.
Xatırladaq ki, 2016-cı ildə Beynəlxalq Avrasiya Mətbuat Fondunun prezidenti Umud Mirzəyevin şəxsi dəvəti ilə ölkəmizə səfər edən Məhəmməd Yunus ölkə prezidenti İlham Əliyevlə də görüşüb.
