Bu gün Şamaxıda İqtisadiyyat Nazirliyinin, Azərbaycan Milli Elmlər Akademiyasının İqtisadiyyat İnstitutunun və ADA Universitetinin birgə təşkilatçılığı ilə “Azərbaycanın post-konflikt ərazilərində iqtisadi potensialın qiymətləndirilməsi və müqayisəli üstünlük sahələrinin seçilməsi” mövzusunda kompleks tədqiqat çərçivəsində “İşğaldan azad olunmuş ərazilərin innovativ iqtisadi inkişaf imkanları” mövzusunda elmi-praktik konfrans keçirilir.
Tədbir Azərbaycan Respublikası İqtisadiyyat Nazirliyi yanında Dövlət Vergi Xidmətinin Tədris Mərkəzinin Şamaxı rayonunda yerləşən kompleksində baş tutub. Azərbaycan Respublikası İqtisadiyyat Nazirliyi və ADA Universiteti ilə birlikdə təşkil olunan konfransda ölkəmizin dövlət qurumlarının və aparıcı elm, təhsil müəssisələrinin mütəxəssisləri dəvət olunub. Konfransda Beynəlxalq Avrasiya Mətbuat Fondunun (BAMF) prezidenti Umud Mirzəyev də iştirak edir.
Dövlət Vergi Xidmətinin Tədris Mərkəzində keçirilən tədbirdə İqtisadiyyat nazirinin müavini Sahib Ələkbərov, AMEA-nın İqtisadiyyat İnstitutunun Baş direktoru, professor Nazim Müzəffərli, Şamaxı rayon İcra Hakimiyyətinin başçısı Tahir Məmmədov, İqtisadiyyat Nazirliyi yanında Dövlət Vergi Xidmətinin Tədris Mərkəzinin rəhbəri Mirəli Kazımov açılış nitqi ilə çıxış edib.
Sonra konfransın birinci sessiyasında məruzələr dinlənilib.
Konfransda çıxış edən iqtisadiyyat nazirinin müavini Sahib Ələkbərov bildirib ki, işğaldan azad olunmuş ərazilərdə hər şey sıfırdan başlayaraq qurulmalı olduğundan burada innovativliyi tətbiq etmək daha rahatdır və bunun üçün imkanlar daha çoxdur. Digər tərəfdən, innovativliyin təmin olunmasında həmişə əsas maneələrdən biri olan vəsait çatışmazlığı problemi burada olmamalıdır. Belə ki, təkcə bu il işğaldan azad olunmuş ərazilərin bərpasına dövlət büdcəsindən 2,2 mlrd. manat vəsait ayrılıb və gələn il də ən azı eyni məbləğdə vəsaitin ayrılması nəzərdə tutulur. Gələcəkdə bu məbləğin lazım olan qədər artırılacağı, habelə özəl sektor tərəfindən ayrılacaq vəsaitləri və xarici investisiyaları da bura əlavə etsək, bu məbləğin daha çox olacağı gözlənilir.
Nazir müavini qeyd edib ki, ölkə başçısı tərəfindən Qarabağın “Yaşıl zona” elan edilməsi, müasir sənaye parkları və aqroparkların yaradılması, bu ərazilərdə fəaliyyət göstərəcək sahibkarlar üçün xüsusi vergi güzəştləri və azadolmaların tətbiq olunacağının nəzərdə tutulması da əlavə olaraq kifayət qədər böyük imkanlar deməkdir.
O, konfransda bu və ya digər məsələlərin ətraflı müzakirə ediləcəyini bildirib: “Təşkilatçılar pandemiya şəraitini və konfransımızda da innovativ metodlardan istifadə sahəsində nümunə göstərmək istəyini nümayiş etdirərək iclasların internet üzərindən canlı olaraq yayınlanmasını da təmin ediblər və güman edirəm ki, bu, marağı olan daha çox insana konfransımızın gedişini izləmək və öz təkliflərini təqdim etmək imkanı verəcək”.
Sahib Ələkbərov konfrans iştirakçılarının diqqətinə çatdırıb ki, innovativ iqtisadi inkişaf innovasiya axınına, mütərəqqi texnologiyaların geniş tətbiqinə, yüksək əlavə dəyərə malik yüksək texnoloji məhsulların istehsalına və ixracına əsaslanır. İşğaldan azad olunmuş ərazilərdə innovativ kənd təsərrüfatı modellərinin tətbiq olunması, dağ-mədən sənayesinin innovativ texnologiyalar əsasında inkişaf etdirilməsi, müasir texnologiyalara əsaslanan nəqliyyat-loqistika sisteminin qurulması, bərpa olunan enerjidən, yəni günəş, külək, su enerjisindən istifadə etməklə ekoloji tarazlığın təmin edilməsi, müasir tələblərə cavab verən mütəxəssislərin hazırlanması və yenidən hazırlanması innovativ iqtisadi inkişafın əsas istiqamətlərindəndir.
Azərbaycan Respublikası Prezidentinin Ağdam rayonu üzrə Xüsusi nümayəndəsi Emin Hüseynov Ağdam rayonunda innovativ iqtisadiyyat: praktik işlər və yaxın gələcək üçün perspektivlər, AMEA-nın Birinci Vitse-prezidenti, akademik Arif Həşimov İnnovativ iqtisadiyyat və elmin təşkili sistemində islahatlar, Azərbaycan Respublikası Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayev Potensial repatriantların “ağıllı şəhər”, “ağıllı kənd”, “ağıllı iqtisadiyyat” mühitində yaşayışa hazırlanması məsələləri, Azərbaycan Respublikası Milli Məclisinin deputatı, Azərbaycan İqtisadçılar İttifaqının sədri, akademik Ziyad Səmədzadə Şərqi Zəngəzur və Qarabağ iqtisadi rayonlarında rəqabətə davamlı sənaye potensialının yaradılması haqqında məruzələrlə çıxışlar ediblər.
Fasilədən sonra konfrans ikinci sessiyada məruzələrin dinlənilməsilə davam edib.
Rəqəmsal İnkişaf və Nəqliyyat Nazirinin müşaviri Rəşad Həsənov Post-konflikt dövrdə innovativ texnologiyaların yenidənqurma və inkişafda rolu, Azərbaycan Dövlət Neft və Sənaye Universitetinin rektoru, t.e.d., professor Mustafa Babanlı İnnovativ iqtisadiyyat və innovativ insan, Azərbaycan Respublikası Dövlət Statistika Komitəsinin sədr müavini Yusif Yusifov Azərbaycanda iqtisadiyyatın innovativlik səviyyəsinin ölçülməsi sahəsində problemlər və onların həlli yolları, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət agentliyinin sədr müavini Ceyhun Salmanov İnnovativ məhsul və xidmətlər istehsalının təşviqi mexanizmləri, Azərbaycan Respublikası Kənd Təsərrüfatı Nazirliyinin Aqrar Tədqiqatlar Mərkəzinin Direktoru, i.f.d. Firdovsi Fikrətzadə Qarabağın kənd təsərrüfatında innovativ texnologiyalarda istifadə perspektivləri, AMEA İqtisadiyyat İnstitutunun İcraçı direktor əvəzi, i.f.d., dosent Allahyar Muradov İnnovativ iqtisadi inkişafın “mühit çərçivəsi” mövzusunda məruzələrlə çıxış ediblər.
Tədbir çıxış və müzakirələrlə davam edir.
