Antalya Diplomatiya Forumu 2022 çərçivəsində Türkiyə Prezident Administrasiyasının Kommunikasiya İdarəsinin təşkilatçılığı ilə “Həqiqətdən sonrakı dövrdə dezinformasiya ilə mübarizə” mövzusunda panel təşkil edilib.
Ednews xəbər verir ki, paneldə çıxış edən Azərbaycan Respublikası Prezidentinin köməkçisi - Azərbaycan Respublikası Prezidentinin Administrasiyasının Xarici siyasət məsələləri şöbəsinin müdiri Hikmət Hacıyev dezinformasiya və ya yanlış məlumatlandırma ilə mübarizədə qlobal yanaşmanın tətbiq edilməli olduğunu bildirib.
Yalan məlumatların ötürülməsinin təkcə sosial şəbəkədə və ya mediada deyil, siyasətdə də olduğunu vurğulayan H.Hacıyev “Doğru məlumatı mümkün qədər tez hazırlayıb çatdırmaq vacibdir. Susmaq və ya görməzlikdən gəlmək kifayət deyil, “kiçik məlumatdır, bir şey olmaz” deyilməməlidir. Tez bir zamanda cavab verilməlidir”,-deyə bildirib.
Prezidentin köməkçisi qeyd edib ki, dezinformasiya həmişə mövcud olub, lakin yeni texnologiyaların və sosial medianın inkişafı ilə daha da yayılıb:
“Bütün qurumlar bir araya gəlib dezinformasiyaya qarşı mübarizə aparmalıdır. Dezinformasiyanın arxasında duran bəzi insanlar cəmiyyətlərdə çatlar yaratmaq, manipulyasiyaya yol açmaq istəyirlər və bunu qəsdən edirlər. Hökumətlərə inamı qırmaq istəyirlər”.
Qeyd edək ki, daha sonra Türkiyə Prezident Administrasiyasının Kommunikasiya İdarəsinin Strateji Əlaqə və Böhran İdarəetmə şöbəsinin müdiri Gökhan Yücel çıxış edib və qurum olaraq dezinformasiyaya qarşı effektiv mübarizə aparmağa çalışdıqlarından danışıb:
“Əgər işlərimizi digər seqmentlərlə birlikdə görməsək, dezinformasiyaya qarşı mübarizəmiz həmişə uğursuz olacaq. Ona görə də hekayələrimizi, demək istədiklərimizi düzgün planlaşdırmasaq, bəzi başqa qruplar, düşmənlər araya girib buradakı boşluqları doldurarlar. Bu isə milli, beynəlxalq və ya regional təhlükəsizlik probleminə səbəb ola bilər”.
O, Türkiyənin üzləşdiyi ən mühüm problemlərdən birinin dezinformasiya olduğuna diqqət çəkib:
“Türkiyə ciddi dezinformasiyaya məruz qalır. Bunun niyə baş verdiyini araşdırırıq. Araşdırdıqda FETÖ-nün nə etdiyini, nə dediyini, necə saxta xəbərlər yaydığını və manipulyasiyalar həyata keçirdiyini görürük. Biz PKK və onun törəmələrinin, marjinal qrupların necə dezinformasiya yaratdığını, saxta xəbərlər yaydığını və bu yolla internet üzərindən Türkiyə dövlətinə və xalqına hücum etməyə çalışdığını bilirik. Bu sosial şəbəkə hesablarının sahibləri başqa ölkələrdə yaşayırlar. Onların aşkarlanması mürəkkəb və çətindir. Ancaq bəzi şeylər çox aydındır. Həmkarlarımızla görüşərkən deyirik ki, baxın, bu qruplar, bu insanlar və ya bu hesablar davamlı olaraq Türkiyə Cümhuriyyətinə və onun maraqlarına hücum edir. Haqqında danışdığım bu qruplar bəzi ölkələrdə yaşayan hesab sahibləridir”.
