31 mart - Azərbaycanlıların Soyqırımı Günü ilə əlaqədar Vətəndaş Birliyi Partiyası bəyanat yaydı
Ednews xəbər verir ki, bəyanatda deyilir:
“Böyük Ermənistan” xülyası ilə yaşayan erməni millətçiləri Azərbaycan xalqına qarşı tarix boyu məqsədyönlü şəkildə soyqırım, etnik təmizləmə siyasəti həyata keçirməklə dəhşətli cinayətlər həyata keçirib. Lakin 104 il bundan öncə 1918-ci ilin mart ayında həyata keçirilən soyqırım cinayəti xüsusi amansızlığı ilə fərqlənib. On minlərlə insan yalnız azərbaycanlı olduqları üçün ermənilər tərəfindən vəhşiliklə qətlə yetirilib.
1918-ci ilin mart-iyul aylarında erməni quldur dəstələri tərəfindən həyata keçirilən soyqırım siyasəti nəticəsində 50 mindən çox azərbaycanlı bu cinayətin qurbanı olub. Ermənilər demək olar ki, Azərbaycanın bütün bölgələrində, Bakıda, Quba qəzasında, Şamaxıda, Qusarda, İrəvanda, Naxçıvanda, Zəngəzurda, Qarabağda, Lənkəranda, soyqırım cinayəti həyata keçirib. Bu ərazilərdə yaşayış məntəqələri mədəniyyət abidələri, məscid və qəbiristanlıqlar yerlə-yeksan edilərək, öz torpaqlarından qovulub.
Ermənilərin bu siyasəti sonrakı dövrlərdə də davamlı olaraq həyata keçirilib. SSRİ dövründə azərbaycanlılar öz ata yurdlarından deportasiya edilərək didərgin düşüb. SSRİ-nin süqutu ərəfəsi və ondan sonrakı dövrdə azərbaycanlılara qarşı etnik təmizləmə siyasəti daha amansız forma alıb. 1992-ci ildə Xocalıda törədilən soyqırım cinayəti bunun bariz nümunəsidir.
Təəssüflü məqam isə ondan ibarətdir ki, beynəlxalq birlik ermənilərin törətdiyi bu dəhşətli cinayətə nə siyasi, nə də hüquqi qiymət verməyib. Beynəlxalq birliyin və təşkilatların dövlətlərə münasibətdə belə bir ayrı-seçkilik etməsi beynəlxalq humanitar hüquq prinsiplərinə də ziddir. Beynəlxalq birliyin ermənilərin bu dəhşətli cinayətlərinə laqeyd münasibət bəsləməsi dünyanın digər bölgələrində soyqırım, etnik təmizləmə, hərbi cinayət əməlləri üçün pis presidentlərə səbəb olur.
Vətəndaş Birliyi Partiyası olaraq biz beynəlxalq birliyi ermənilərin azərbaycanlılara qarşı törətdiyi soyqırım, etnik təmizləmə, deportasiya, hərbi cinayətlərinə siyasi və hüquqi qiymət verməyə çağırırıq”.
Millət vəkili Sabir Hacıyev
