Ədliyyə Nazirliyi tərəfindən qadın və yetkinlik yaşına çatmayan məhkumlar üçün yeni inşa edilən penitensiar müəssisəsinə mediatur təşkil olunub.
Mediatur zamanı millət vəkiləri, ictimaiyyət nümayəndələri və jurnalistlər Zabrat qəsəbəsində qadın və yetkinlik yaşına çatmayan məhkumlar üçün yenicə istifadəyə verilən 4 saylı cəzaçəkmə müəssisəsinin ərazisinə baxış keçirib məhkumlar üçün yaradılan şəraitlə tanış olublar.
Cəzaçəkmə müəssisəsində ümumilikdə 426 qadın, yetkinlik yaşına çatmayanların Tərbiyə Müəssisində isə 21 nəfər cəza çəkir.
Daha sonra qadın və yeniyetmə məhkumların da iştirakı ilə tədbir keçirilib.
Tədbirdə Ədliyyə Nazirliyinin Penitensiar və Probasiya xidmətləri və həmçinin aidiyyəti məhkəmələr tərəfindən Zəfər Günü münasibətilə elan edilən amnistiyanın 12570 nəfərə tətbiq edildiyi bildirilib. Qeyd edilib ki, cəzadan azad olunanların 5009-u Penitensiar, 6759-u Probasiya xidmətləri tərəfindən tətbiq olunub. Amnistiyanın tətbiqi nəticəsində 8138 nəfər ayrı-ayrı cəzalardan azad edilib, 3630 nəfərin isə cəzası azaldılıb.
Tədbirdə çıxış edən Ombudsman Səbinə Əliyeva qeyd edib ki, penitensiar sistemin müasirləşdirilməsi istiqamətində həyata keçirilən tədbirlər cəzaların icrası ilə bağlı fəaliyyətin müasir dövrün tələblərinə uyğun qurulmasını və səmərəli idarəetmənin təşkilini zəruri edir.
“Bununla bağlı ölkə başçısının qarşıya qoyduğu vəzifələrin icrası məqsədilə penitensiar müəssisələrin fəaliyyətinin müasirləşdirilməsi, infrastrukturun müasir standartlara uyğunlaşdırılması kimi tədbirlər olduqca vacibdir. Cəmiyyətin həssas qrupu olan qadın və yetkinlik yaşınna çatmayan məhkumlar üçün yeni inşa olunmuş müasir penitensiar müəssisə bu sahədə mövcud olan beynəlxalq standartlara tam cavab verməklə yanaşı, məhkumların hüquqlarının daha səmərəli müdafiəsi baxımından əhəmiyyətli olacaq”.
İnsan hüquqları komitəsinin sədri Bahar Muradova yeni məkanın azadlıqdan məhrum olan insanların istifadəsi üçün çox yararlı olduğunu vurğulayıb.
“Amma biz onların hissiyatlarını başa düşürük və inanırıq ki, onlar vəziyyəti daha düzgün dəyərləndirəcək. İnsan cinayət törədibsə o məhkum kimi də hüquqlara malikdir və o hüquqlar qorunmalıdır. Dövlətimiz bunun öhdəsindən layiqincə gəlir. Biz müəssisədə cəza çəkən vətəndaşların qarşılaşdığı problemlərlə məşğul oluruq və hər dəfə də əməkdaşlarımız ürək ağrısı ilə çalışırlar ki, onları həll etsinlər. Cəmiyyətin çox təəssüf ki, bir o üzü, bir də bu üzü var. Sizə arzulayardım ki, tezliklə qapılarınız açılsın. Bu gün hər kəs üçün doğan günəş sizi azadlıqda qızdırsın. Bir daha siz öz emosiyalarınızı, hisslərinizi cilovlamaq imkanını əldən verməyəsiniz”.
Ailə, Qadın və Uşaq Problemləri üzrə Dövlət Komitəsinin sədri Hicran Hüseynova bildirib ki, qadınların ailəsinə, cəmiyyətə tam hüquqlu üzv kimi qayıtması üçün müasir işlək mexanizmlər həyata keçirilir.
“Bu sahədə ayrıca qanun qəbul edilmişdi və penitensiar xidmətin fəaliyyəti də xeyli təkmilləşdirilmişdi. Ümumilikdə ədliyyə orqanlarının inkişafı üçün həyata keçirilən islahatların nəticələri göz qabağındadır. Məhkumların hüquqlarının qorunması və saxlanma şəraitinin yaxşılaşdırılması üçün ardıcıl tədbirlər görülüb".
Milli Məclisin İnsan hüquqları komitəsinin sədri Zahid Oruc bildirib ki, qadın elə cəza çəkməlidir ki, o qadınlığını saxlasın.
“Hər bir cəmiyyəti qadına münasibətlə ölçürlər. Qadın var məhbəsdə azaddır, qadın var azadlıqda biz ona məhbəs düzəltmişik. Vətən müharibəsində şəhid övladını çiyinlərində daşıyan qadınlarımızı da gördük. Qadınlarımız nə qədər mükəmməl, güclü və təhsilli olacaqsa cəmiyyətimiz bir o qədər işıqlı olacaq”.
Daha sonra tədbir məhkumlar üçün təşkil edilən musiqi proqramı ilə davam edib.
