Bundan bir neçə gün öncə BakuTv-nin əməkdaşı, hərbi jurnalist Mübariz Aslanov mətbuat konfransında Ukrayna Prezidenti Volodimir Zelenskiyə sual ünvanlayarkən rus dilində səlist danışa bilməməsindən dolayı sosial şəbəkədə sərt tənqidlərə məruz qalıb.
Xatırladaq ki, Mübariz Aslanov Ukrayna ərazisində qızğın döyüşlərin getdiyi şəhərlərdən reportajlar hazırlayan azsaylı hərbi müxbirlərdəndir.
Mövzu ilə bağlı Azərbaycan mediasının məşhur simaları Ednews-a fikirlərini bildiriblər.
Hazırda Türkiyənin İstanbul şəhərində yaşayan, jurnalist, yazar və publisist İbrahim Nəbioğlu bildirib ki, Mübariz Aslanovla şəxsi tanışlığı yoxdur, onun fəaliyyətini izləməyib. Lakin...
“İstənilən halda insanı bu formada tənqid etmək ümumiyyətlə, yaxşı bir şey deyil, ələlxüsus sosial şəbəkələrdə. Çünki burada mütləq anonimlik, trolluq və bilinməyən insanlar var və mən bunu arxadan zərbə kimi qiymətləndirirəm.
Üzündən-gözündən abırlı bir azərbaycanlı övladına oxşayır və onun rus dilində pis danışması çatışmazlıq deyil. Yaxşı, bəs onda rus dilini bilən uşaqlar hardadır? Sosial şəbəkələrdə mən ana dili ilə bağlı həmişə məsələ qaldırıram.
Xarici ölkəyə jurnalist ezam edilirsə nəinki o ölkənin dilini, hətta oranın tarixini, ənənələrini, siyasi keçmişini bilməlidir”.
İ. Nəbioğlu bildirib ki, önəmli olan qarşı tərəfin verdiyi cavablardır.
“Mübariz Aslanov rus dilini səlist bilməsə də Zelenski onu başa düşüb. Onun yerinə ABŞ prezidenti Bayden də olsa və jurnalist ingilis dilində də bu cür qeyri-səlist danışsa onu anlayardı. Jurnalistin əcnəbi dil bilməsi mütləq deyil, amma məsələn Fransaya gedib fransız dilini bilmirsə orada müxbirlik edə bilməz. Lakin Bakıda Fransa haqqında məqalə yaza bilər. Ümumiyyətlə götürsək isə müxbir hərtərəfli və dünyagörüşü geniş olmalıdır. Bu isə təhsillə bağlıdır”.
Azərbaycan Jurnalistlər Birliyinin sədri Elçin Şıxlı isə bildirib ki, münaqişə olan ərazilərdə çəkilişlər edən jurnalist riskə gedir və buna görə həmin adama təşəkkürlər düşür.
“Hər jurnalist müharibə gedən zonalara getməyə hazır olmur. Bu insan isə Xarkovda, Kiyevdə və s. qızğın döyüşlər gedən ərazilərdə olub. O ki, qaldı rus dilini zəif bilməsinə gərək mətbuat konfransındakı insanlara deyərdi ki, sualımı Azərbaycan dilində verəcəm, mənası budur, siz də tərcümə edin. Həm də ana dilində danışması daha effektli ola bilərdi. Sualın özünə gəldikdə isə o zəif idi. Sadəcə olaraq, Zelenski bundan istifadə edərək Azərbaycan və Türkiyəyə olan münasibətini bildirib. İstənilən halda həmin junalistin döyüş bölgəsində olmasını nəzərə almaq lazımdır”.
Yazıçı həmçinin bildirib ki, insan nə qədər çox dil bilsə bir o qədər yaxşıdır.
“Biz öz gücümüzü real qiymətləndirməli və gücümüzü biliklə, intellektlə ifadə etməliyik. Düşmənin dilini bilmək lazımdır. İnsanlarda elə bir fikir formalaşıb ki, rus dilində danışanlar pis adamlardır. Mən demirəm uşaqları rus dilli məktəblərə yazdıraq. Onlar ilk növbədə ana dilində danışmalı, sonra digər dilləri öyrənməlidirlər.
Məsələ burasındadır ki, Azərbaycan dilli əhali rus dilini bilən və o dildə danışan əhalidən fəallıqda geri qalır. Bir çox hallarda öz fikrini samballı ifadə edən insanlar rus dilli olub. Bizdə isə bir az söyüşə, təhqirə keçirik.
Bizim xeyli savadlı insanlarımız var, ancaq Rusiyanın təbliğatçı kanallarına rus dilində normal danışan adam çıxara bilmirik. Belə bir şərait yarananda da deyirsən ora çıxmasaydı daha yaxşı idi”.
Milli.az saytının baş redaktor müavini, jurnalist Elçin Alıoğlu Ednews-a açıqlaması zamanı qeyd edib ki, başqa ölkədə çalışan azərbaycanlı jurnalist o ölkədə geniş yayılmış dövlət dillərindən birində səlist və sərbəst danışmağı bacarmalıdır.
“Lakin konkret olaraq həmkarımla bağlı məsələyə gəldikdə isə sosial şəbəkələrdə olan bu kampaniya ürəkaçan deyil və birmənalı da deyil. Söhbət həmin şəxsin rus dilini bilməsi və ya sualı formalaşdırmaq bacarığından getmir. Təbii ki, o rus dilini çox pis bilir və təbii olaraq sualı formalaşdıranda bir az həyəcanlanıb. Amma Ukraynada hərbi əməliyyatlarda onun göstərdiyi fəaliyyət, gördüyü işlər də unudulmamalıdır. Eyni zamanda ümid edirəm ki, dəyərli həmkarım bu problemi qısa zamanda aradan qaldıracaq”.
Gülnar Səlimova
.jpg)
