Xəbər verdiyimiz kimi Bakı Şəhər İcra Hakimiyyəti (BŞİH) başçısının müvafiq Sərəncamına əsasən paytaxtdakı küçə və prospektlərin inventarlaşdırılması, onlara adların verilməsi və dəyişdirilməsi ilə bağlı Komissiya yaradılıb.
Komissiyanın tərkibinə şəhər və paytaxt rayonları İcra Hakimiyyətlərinin məsul nümayəndələri ilə yanaşı tarixçi və dilçi alimlər də daxil edilib.
Bəs, indiyə qədər Bakının küçə və prospektlərinin adlandırılmasında vəziyyət necə idi?
Ednews məsələ ilə bağlı kiçik bir araşdırma aparıb. Ortaya çıxan mənzərə isə çox təəssüf ki, heç də ürəkaçan olmayıb. Belə ki, “Google” xəritəsinin axtarış hissəsində Bakı şəhərinin küçə adlarını qeyd etdikdə ortaya ilginc, bəzən isə gülünc mənzərələr çıxır.
Sovet dönəmində demək olar ki, Bakı küçələrinin əksəriyyətini, inqilabçıların, kommunistlərin, Sovet hakimiyyətində təmsil olunan şəxslərin adları bəzəyirdi.
Hətta burada çoxluq erməni adlarından və sözlərindən ibarət idi. Hazırda bu adların çox hissəsi dəyişdirilsə də köhnə, anlamsız küçə adlarının qaldığı ərazilər də var. Məsələn (Keçid məhəllə”, "Vtorçermet - Yusifzadə”, "Rezervuar”, "İzlivnoy”, "Stroydetal”, "2-ci dəmiryol küçəsi”, "3-cü dəmiryol küçəsi”, "1-ci - 15-ci sıra küçələri”, "Vorovski”, "Xutor”, Yasamal rayonu ərazisindəki "7-ci Sallaqxana”, Nəsimi rayonunda yerləşən "22-ci dairə”, "Kərpic”, "7-ci Sverdlov”, "Todorski”, "Droqal” küçələri, 2-ci Dağlıq küçəsi və.s)
Bəzən isə qarşımıza elə küçə adları çıxır ki, ümumiyyətlə bu ad bizə heç nədən xəbər vermir.
Küçələrə şəhid adları verilməlidir...
Azərbaycanın haqq savaşı - 44 günlük müharibədən sonra isə küçə və prospekt adlarının dəyişdirilməsi məsələsi gündəmə gəlib.
Hazırda cəmiyyət arasında yuxarıda sadalanan bu cür mənasız və anlaşılmaz adlar öz etnik mənzərəsini saxlamaqla Vətən mühairbəsində həlak olanların, əsasən də Azərbaycanda yaşayan azsaylı xalqların şəhid nümayəndələrinin adları ilə dəyişdirilməsi təklif olunur.
Bu təkliflə Bakı şəhər İcra Hakimiyyətinə müraciət etdik. Qurumdan təklifimizi yüksək qiymətləndirərək bildirdilər ki, bu prosesin ətrafında müəyyən işlər gedir.
Ednews-a verilən məlumata görə, şəhid adlarının əbədiləşdirilməsi haqqında Prezidentin fərmanı, Nazirlər Kabinetinin sərəncamı var:
“Biz artıq şəhidlərin adına müəyyən sənədləri toplamışıq. Şəhidlərin adlarının əbədiləşdirilməsi üçün onların valideynləri bizim quruma müraciət ediblər. Hazırda bütün Bakının rayonları ərazilərində olan şəhidlərin adlarını toplayıb təhlil edirik.
Bu işin icra olunması proseduruna gəldikdə isə Prezidentin fərmanı əsasında Nazirlər Kabineti qanun çıxarır, Bakı İcra Hakimiyyəti isə bu işi icra edir.
Bəs, azsaylı xalqların şəhid nümayəndələrinin adları gələcəkdə küçə və prospektlərə verilə bilərmi?
Qurumdan bildirilib ki, əsasən regionlarda bu xalqların nümayəndələrinin adlarına bəzi küçələr var. Bakıda da bu həyata keçirilə bilər. Ancaq nəzərə alsaq ki, Bakı şəhərində düşündüyünüz kimi, o qədər də küçə yoxdur. Bundan başqa şəhid adı ilə adlandırılan küçə də onun adına layiq olmalıdır. Çünki 50-100 metrlik küçələrə şəhid adı vermək bir az yaxşı olmaz. Biz onların xatirəsinə ehtiramla yanaşırıq”.
Gülnar Səlimova
.jpeg)