Artıq bir həftədən çoxdur ki, ölkə ərazisində hava şəraiti kəskin dəyişib.
Bu, may ayında havaların qızmasına adət edən əhali üçün təəccüblü olub. Yay fəsli ərəfəsində soyuq keçən aylara xarakterik iqlim şəraiti səyahət etmək istəyən insanlara da əngəl olub. Digər tərəfdən havaların qeyri-sabit keçməsi mövsüm tərəvəz və meyvələrinin yetişməsinə də öz təsirini göstərib.
Bununla bağlı ekoloq, “Biosfer” İctimai Birlyinin sədri Qorxmaz İbrahimli Ednews-a açıqlaması zamanı bildirib ki, bu mövzunu çox gündəm ediblər, amma...
“Hava şəraiti 8-10 ildən bir müəyyən amplitudalarda dəyişir. Fikrimcə, hazırdaki hava normal bir haldır. Bu, çox güman ki Atlantik okeanından daxil olan soyuq hava cərəyanlarının təsiri ilə, qərb ölkələri - Türkiyə, Gürcüstan, Azərbaycanın qərb rayonlarından gələn soyuq hava kütlələrindən yaranan yağıntılı soyuq havadır. May ayında biz dəfələrlə belə halla rastlaşmışıq. Bunu iqlim dəyişikliyi ilə bağlayırlar, lakin bu qətiyyən belə deyil. İqlim dəyişikliyinin qlobal anlamda təbiətə təsiri var, amma bu il may ayında yağıntıların normadan bir az artıq olması o demək deyil ki, bizim iqlim dəyişkiliklərinin təsiri altındayıq".
Ekspert hava şəraitinin kənd-təsərrüfatı məhsullarına təsiri haqda qeyd edib ki, əsas tozlanmanın getməsidir.
“Artıq kənd-təsərrüfatında meyvələrdə - gilas, ərik, şaftalıda tozlanma gedib. Hava o qədər də mənfi temperatura keçmədiyinə görə və uzun müddət soyuq olmayacağı üçün buna mənfi təsir etməyəcək. Dağlıq rayonlarda da çiçəklənmə hələ indi başlayıb. Düşünürəm ki, onlara da elə bir ciddi təsiri olmayacaq”.
Xatırladaq ki, Milli Hidrometeorologiya Xidmətindən verilən məlumata görə havanın nisbətən sabitləşməsi mayın 13-də gözlənilir. Bildirilib ki, respublikanın rayonlarında mayın 9-u və 10-da fasilələrlə yağıntılı hava şəraiti davam edəcək. Lakin güclü yağıntılar gözlənilmir.
İndiyə olan məlumata əsasən, ölkə ərazisində qeyri-sabit, yağıntılı hava şəraiti davam edir, bəzi yerlərdə şimşək çaxıb, fasilələrlə yağış yağıb.
Gülnar Səlimova
.jpeg)
