Bakı məktəblərində çalışan müəllimlərin orta aylıq əmək haqqı 778 manat məbləğində hesablanıb.

Müəllim maaşının statistik göstəriciləri isə cəmiyyət arasında heç də birmənalı qarşılanmayıb. Xüsusən də bu göstərici müəllimlər tərəfindən narazılıq doğurub.

Adının çəkilməsini istəməyən və Bakı şəhərinin təhsil ocaqlarından birində dərs deyən müəllimə Ednews-a açıqlamasında bildirib ki, o,15 illik fəaliyyəti dövründə aylıq məvacibi 400 manatdan artıq olmayıb.

“Məktəbdə 14 kimya müəllimi var. Dərs saatları isə 7-ci sinifdən başlayır. 9-cu sinifdən sonra isə məktəb təməyüllü olduğu üçün ancaq 1-4-cü qrup uşaqlarına dərs deyirik. Bir təmayül sinfi varsa, ona da bir müəllim düşür. Bu da müəllimlər arasında narazılığa səbəb olur. Olmayan dərs saatlarından mən necə 778 manat ala bilərəm? Bu il aylıq olaraq mənə 16 saat kimya saatı düşüb. Bu da təxmini 400 manat edir. Özüm də 15 ildir müəllim kimi fəaliyyət göstərirəm, bu il ilk dəfədir bu qədər çox maaş alıram”.

Ümumiyyətlə, müəllimlərin orta əmək haqqı dedikdə hansı kriterialar nəzərdə tutulur? Əgər bu qiymət 778 manatdırsa, 15 illik təcrübəsi olan müəllim nə üçün 400 manat alır? 

Məsələnin aktuallığı nəzərə alaraq təhsil eksperti Elçin Əfəndi ilə həmsöhbət olduq. O, Ednews-a açıqlamasında orta əmək haqının hansı müəllimlərə şamil edildiyindən danışıb. 

“Bunu hazırda çalışan 160 min müəllim sayına aid edə bilmərik. Bu yalnız tam ştatı, müəyyən pedeqoji fəaliyyətli və fəxri adı olan müəllimlərə şamil edilir. Bu sıraya həmçinin sinif rəhbəri vəzifəsi olan müəllimlər də aiddir. Elə müəllimlər var ki, 200-300 manat, elələri də var ki, 1000 manatdan çox əmək haqqı alır”. 

Regionlar və Bakı şəhəri üzrə ümumi əmək haqqı məsələsinə də toxunan Elçin Əfəndi onu da qeyd edib ki, regionda dərs deyən müəllimlər daha çox əmək haqqı alır. 

“Əlbəttə ki, regionda dərs deyən müəllimlərin əmək haqqları Bakı şəhərində dərs deyən müəllimlərdən daha çoxdur. Bunun səbəbi onların yaşam üçün lazimi şəraitlərinin olmaması, kommunal, kirayə ev və s-dir”.

Ləman Abbaslı