Xəbər verdiyimiz kimi, Bakı şəhəri, Nəsimi rayonu, Bülbül prospekti 18-30 ünvanında ağacların kəsilməsi və piyada səkisinin daraldılması halına görə, həmin parklanma ərazisi ölkə başçısının müvafiq əmri ilə sökülüb və araşdırmalara başlanılıb.
Hazırda paytaxtda bir nömrəli problem parklanma ərazilərinin yetəri qədər olmamasıdır. Bir sıra tədbirlərin həyata keçirilməsinə baxmayaraq, parklanma problemi hələ də öz həllini tapa bilməyib. Mövcud vəziyyətin aradan qaldırılması üçün xüsusi ərazilərin yaradılmasına olan tələbat isə günbəgün artmağa davam edir.
Nəqliyyat eksperti Eldəniz Cəfərov ətraf mühitə zərər vermədən də parklanma ərazilərinin yaradılmasının mümkün olduğunu vurğulayıb. O, bu barədə Ednews-a açıqlaması zamanı danışıb.
Eldəniz Cəfərov bildirib ki, Dövlət proqramında Bakı şəhərində parklanma yerlərinin təşkili ilə bağlı müəyyən müddəalar var. Belə ki, paytaxtda bütün yaşayış və qeyri-yaşayış ərazisi hesab olunan yerlərdə mütləq şəkildə parklanma məntəqələri olmalıdır. Yeraltı, yerüstü və çoxmərtəbəli parklanma yerlərinin tikilməsinə daha çox ehtiyac olduğunu deyən ekspert əsas məsuliyyətin müvafiq qurumların üzərinə düşdüyünü də qeyd edib. Həmçinin, ekspert, vətəndaşların əksəriyyətinin parklanma yerlərinin mövcudluğundan xəbərsiz olduğunu da vurğulayıb.
“Parklanma yerlərinin əraziləri, ünvanları, demək olar ki, ictimaiyyətə açıqlanmır. Bu səbəblə, sürücülər avtomobillərini istədikləri yerdə saxlayaraq cərimələnir, yaxud qeyri-qanuni şəkildə fəaliyyət göstərən parklanma ərazilərinə müəyyən məbləğdə vəsait ödəməli olurlar”.
Eldəniz Cəfərov bu problemlərin daha çox mərkəzi küçələrdə qeydə alındığını bildirib.
“ Ümumlikdə, Bakının bütün ərazisində parklanma problemi var. Çünki, tikilən yerlərin heç biri üçün xüsusi parklanma əraziləri təşkil edilmir. Bu ərazilər obyektdə yaxud qurumda çalışan işçilərin sayına uyğun olaraq hazırlanmalıdır. Kənar yeelərlə yanaşı, bir çox tanınmış yeelərin belə parklanma ərazisi yoxdur”.
Ekspert müvafiq qurumların vəziyyətə məsuliyyətsiz yanaşdığını da qeyd edib.
“Bu məsələləri mərhələ ilə həll etmək mümkündür, lakin aidiyyatı qurumların hər hansı bir təşəbbüsünü, layihəsini görə bilmirik. Deyilir ki, Bakı şəhərində parklanma tarifləri müəyyən edilmədiyinə görə məsələ “havada” qalıb. Amma bu düzgün yanaşma deyil. Parklanma qiymətlərinin müəyyən və onların təşkil edilməməsi demək deyil”.
Eldəniz Cəfərov mövcud vəziyyətin ən çox sürücülərə mənfi təsir etdiyini də qeyd edib.
“Əsasən, taksi sürücüləri bu vəziyyətlə əlaqədar olaraq zərər çəkirlər. Çünki, onlar müştərilərini müvafiq ünvandan təhvil alıb, qeyd edilən ünvana çatdırmalıdırlar. Bu səbəblə sürücülər əsassız olaraq parklanma qaydalarını pozduğuna görə cərimələnir. Bu da onların .maddi vəziyyətinə çox təsir edir”.
Nəzrin Beydiyeva
