Yay fəslinin gəlişi ilə insanlar istirahət etmək üçün çimərliyə üz tuturlar. Havanın isti olması ilə əlaqədar isə bir çoxları dəniz kənarında qidalanan zaman böyük yanlışlıqlara yol verirlər.
Rəsmi statistikaya nəzər saldıqda qida zəhrlənmələrinin bir çoxu məhz çimərlikdə baş verir. Qeyd etmək lazımdır ki, yanlış qidalanma zamanı insan nəinki zəhərlənə, hətta həyatını belə itirə bilər.
Bəs, çimərliklərdə necə qidalanmaq lazımdır?
Məsələ ilə bağlı Ednews-a danışan Azad İstehlakçılar Birliyinin sədri Eyyub Hüseynov isti havalarda kimyəvi reaksiyaların daha da sürətləndiyini deyib.
“Qızmar aylarda ən passiv kimyəvi reaksiyalar belə aktivləşir. Buna görə də qidanın tühlükəsizlik məsələsi belə havalarda daha çox gündəmə gəlir. Əgər qidalar uyğun şəraitdə saxlanmazsa, hətta yararlılıq vaxtı bitmədən belə zəhərlənməyə səbəb ola bilər”.
Sədr həmçinin çimərlik ətrafı restoranlarda satılan qidaların belə təhlükəli ola biləcəyini vurğulayıb.
“Çimərlikdəki kafe yaxud restoranlarda yemək yeyərkən həmin qidaların istehsal tarixinə mütləq diqqət yetirilməlidir. Özləri ilə apardıqları qidaya gəldikdə isə, onları günəş altında saxlamaq olmaz”.
Eyyub Hüseynov çimərliyə üz tutan insanların daha çox yüngül qidalara üstünlük verməli olduqlarını bildirib.
“İstirahət üçün dənizə gedənlər çox zaman bostan bitkilərinə, xüsusilə də qarpıza üstünlük verirlər. Biz, demək olar ki, həmin bostan bitkilərinin tərkibini hər il yoxlayırıq və zərərli maddələrin miqdarının çox olmasına şahidi oluruq. Buna görə də, həcmcə daha kiçik qarpızlara üstünlük vermək daha çox məqsədəuyğundur”.
O, bişirilmiş yeməklərin çimərliyə aparılmasının da insan həyatı üçün təhlükəli olduğunu deyib.
“Çimərliklərdə bişirilmiş lobya, göbələk, balıq bu kimi qidaların istifadəsində xüsusilə uzaq olmaq lazımdır. Qida olaraq meyvələrə üstünlük vermək daha çox arzuolunandır”.
Qida mühəndisi İsa Əliyevin fikrincə isə...
“İnsanların çimərlikdə istədikləri vaxt qidalanması düzgün deyil. Sağlamlıq baxımından suya girməzdən 2 saat öncə qida qəbul etmək daha doğrudur”,- deyə o, qeyd edib.
Xatırladaq ki, Azərbaycanda çimərlik mövsümü iyun ayının 15-dən başlayıb.
