Xəbər verdiyimiz kimi, Azərbaycanda iyulun 1-dən əlilliyin yeni meyarlarla təyinatına başlanılıb.
Dövlət Tibbi-Sosial Ekspertiza və Reabilitasiya Agentliyindən bildirilib ki, yeni qaydalara əsasən əlillik dərəcəsinin təyinatı üçün nəzərdə tutulan xəstəliklərin sayı artırılıb. Həmçinin indiyə qədər əlilliyi olan şəxslərdə təkrar yoxlama aparılmayacaq. Bundan sonra yeni müraciətlər yeni meyarlar əsasında qiymətləndiriləcək.
Dövlət Tibbi-Sosial Ekspertiza və Reabilitasiya Agentliyin mətbuat katibi Tural Qurbanov qanuna edilə dəyişiklərlə bağlı Ednews-a bildirib ki, indiyə qədər müddətsiz əlilliyi olan şəxslər yeni meyarlarla müraciət etməyəcəklər.
“Müddətli əlillər isə hansı ki, əlilliyi beş il üçün təyin olunub, onlar köhnə meyarlarla ödənişlərini ala biləcəklər. Sadəcə olaraq yenidən artırılan əlillik müddəti bitdikdən sonra müraciət edəndə onların əlilliyi yeni meyarlarla qiymətləndiriləcək”.
Qurum rəsmisinin sözlərinə görə, dünənə qədər köhnə meyarlarla təqribən 150 diaqnozla ağırlaşmalar nəzərdə tutulurdusa, yeni meyarlarla bu rəqəm dörd dəfə artırılaraq 650-700-ə çatdırılıb. Bu isə o deməkdir ki, daha çox vətəndaşın əlillik təyinatı aparılacaq.
O bildirib ki, əlilliyin təyini ilə bağlı imtina səbəbləri alan vətəndaşlar yenidən qiymətləndiriləcək. Bu şəxslər yenidən poliklinikaya müraciət edəcək və doldurulmuş yeni forma əsasında 15 iş günü ərzində vətəndaşın əlilliyi müəyyənəşdiriləcək.
Qeyd edək ki, "Əlilliyi olan şəxslərin hüquqları haqqında" qanuna dəyişikliklər edilib. Dəyişikliklərin 2022-ci il iyulun 1-dən qüvvəyə minib. Yeni qaydalara əsasən, əlillik orqanizmin funksiyasının itirmə dərəcəsinə görə, yəni faizlə müəyyən ediləcək. Orqanizmin funksiyasının 30-60 faiz itirilməsi III qrup, 60-80 faiz itirilməsi II qrup, 80-100 faiz itirilməsi isə I qrup hesab olunacaq.
Gülnar Səlimova
.jpeg)