44 günlük Vətən müharibəsi qazisi Abbaslı Samir Yusif oğlu əlillik statusu verilmir.

Bu barədə Ednews-a şikayətində şəxsin özü bildirib. Onun sözlərinə görə 44 günlük Vətən müharibəsində o, pulemyot manqa komandiri kimi könüllü döyüşlərə qatılıb. İki dəfə yaralanan Samir, 32 qəlpə yarası alıb. Vətən müharibəsi bittikdən sonra yoxlanışdan keçəndə ona ürək çatışmazlığı diaqnozu qoyulub. Əmək və Əhalinin Sosial Müdafiəsi Nazirliyinə əlilliklə bağlı müraciət edən Abbaslı Samir ona heç bir reaksiya verilməməsindən şikayətçidir. 

“Müharibə zamanı pulemyotçu, döyüşlərdə  manqa komandiri olmuşam. Əgər mənim müharibədən əvvəl ürəkçatışmazlığım olsa idi, 63 kq çəkisi olan silahı necə istifadə edə bilərdim?! Elə döyüşlərdə ürəyim tutub, ölərdim. Cənab Prezident məni üç medalla təltif edib. Lakin hazırda mənə əlillik statusu vermirlər. Nə edim, dərdimi kimə deyim? Biz o yollarda qan tökmüşük, can vermişik. İndi də bu vəziyyətdəyəm”.

Onun sözlərinə görə, hazırda ağrılarının çox olması onu ailəsinə də baxmağa imkan vermir. Samir şikayəti zamanı bildirib ki, ailəsində heç kəs çalışmır və sağlamlığı onun işləyib, pul qazanmasına da əl vermir.  

“İndi heç yerdə çalışmıram, 80 manat müavinətlə dolanırıq. Qardaşıma, atama, övladlarıma, ailəmə mən baxıram. İki övladım var, biri nitq qüsurludur, heç ona da baxa bilmirəm. 32 qəlpə yarası almışam, hazırda 6-sı bədənimdədir. Artıq canım qalmayıb. Evdə bəzən ağrılarım olur, komaya düşürəm. Bununla bağlı müraciət də etmişəm, əlillik ala bilmirəm. Deyirlər blok edilib adınız. Bir ilə yaxındır müraciət edirəm gah deyirlər düzələcək, gah da deyirlər ki, adın blok edilib, indi baxıla bilinməz. Dəfələrlə şikayət edəcəyimi bildirsəm də deyirlər ki, kimə istəyirsən et”.

Şikayətçinin müraciətini nəzərə alaraq məsələ ilə bağlı Əmək və Əhalinin Sosial Müdafiə Nazirliyinə müraciət etdik. Dövlət Tibbi Sosial Ekspertiza və Reabilitasiya Agentliyinə İctimaiyyətlə əlaqələr şöbəsinin müdiri Tural Qurbanov Ednews-a bildirib ki, vətəndaş Abbaslı Samirə qanunvericiliyə uyğun olaraq əlillik təyin edilə bilməz.

“Abbaslı Samir Yusif oğlunun əlilliyinin qiymətləndirilməsi məqsədi 25.04.2022-ci il tarixində Dövlət Tibbi Sosial Ekspertiza və Reabilitasiya Agentliyində əyani müayinə edilib. Samir Abbaslının sağlamlıq vəziyyətinin müayinəsi zamanı əlilliyə əsas verən əlamətlərin olmadığı müəyyən edilib. Bu baxımdan, qanunvericiliyə uyğun olaraq ona imtina qərarı verilib”.

Ləman Abbaslı