Rusiya sabahdan buğdanın ixrac rüsumunu 20 faiz artırır. Rusiya Kənd Təsərrüfatı Nazirliyinin məlumatına görə, buğdanın ixrac rüsumu iyulun 13-dən etibarən bir ton üçün 5558,9 rubl yəni, 150 manat 9 qəpik təşkil edəcək.
Bəs, bu artım ölkəmizdə un və çörəyin qiymətinə necə təsir edəcək? Deputat Məsələ ilə bağlı Ednews-a danışan deputat Vahid Əhmədov bildirib ki, bununla bağlı qiymət artımı gözlənilmir.
“Bir müddət əvvəl də belə bir hadisə baş verdi, ancaq hökumət qabaqlayıcı tədbirlər gördü. Hazırda Rusiyadan gələn buğdanın ixrac rüsumunun artırılması ölkəmizdə un və un məmulatlarının qiymət artımına təsir edə bilməz”.
Azərbaycan buğda ixracını yalnız Rusiyadan almağa məcburdur?
Deputat yaranan cari situasiya ilə bağlı çıxış yollarından da danışıb. Onun sözlərinə görə, əgər Rusiya ixrac rüsumunu artırırsa və ya bundan siyasi məqsədlər üçün istifadə edirsə, əlbəttə ki, Azərbaycanın daxili bazarına-buğdanın, çörəyin başqa un məmulatlarının qiymətinə müəyyən qədər təsir edə bilər.
“Ancaq burada bir çıxış yolu var. O, da hökumətin Qazaxıstan,Pakistan və digər buğda ixrac edən ölkələrlə əlaqə qurub, müqavilələr bağlamasıdır. Nəzərinizə çatdırım ki, Pakistan dünyada ən çox buğda ixrac edən ölkələrdəndir və Azərbaycana hər zaman taxıl tədarükü ilə bağlı yardım edəcəyini bildirib. Əgər belə tədbirlər görülməyibsə, bu bizim günahımızdır. Manevr imkanları kifayət qədər çoxdur və bu imkanlardan istifadə etmək lazımdır”.
Ləman Abbaslı